చాలా మందికి తమకంటూ ఒక సొంత ఇల్లు ఉండాలని, అక్కడ ప్రశాంతంగా జీవించాలని కల ఉంటుంది. కానీ ఈ కథనం ఒక విభిన్నమైన వ్యక్తి గురించి. ఆయనకు ఒకటి రెండు కాదు.. ఏకంగా 23 ఇళ్లు ఉన్నాయి, అయినా ఆయన అద్దె ఇంట్లోనే నివసిస్తున్నారు.
ఆయనే 32 ఏళ్ల రవి శర్మ. ఆస్ట్రేలియాలో ఉంటున్న ఈ భారత సంతతి వ్యక్తి తన విజయగాథను పంచుకున్నప్పుడు అందరూ ఆశ్చర్యపోయారు. అంత ఆస్తి ఉండి కూడా అద్దె ఇంట్లో ఉండటం ఏంటని అందరూ అడుగుతుంటారు.
రవి శర్మ ప్రాపర్టీ పోర్ట్‌ఫోలియో:
రవి శర్మ ఆస్ట్రేలియా వ్యాప్తంగా 23 ఇన్వెస్ట్‌మెంట్ ప్రాపర్టీలను కలిగి ఉన్నారు. ఆయన ‘సెర్చ్ ప్రాపర్టీ బయర్స్ ఏజెన్సీ’ వ్యవస్థాపకుడు. ఆయన ఆస్తుల మొత్తం విలువ సుమారు 25 మిలియన్ డాలర్లు (దాదాపు రూ. 200 కోట్లు పైమాటే). ఆయన కంపెనీ 2023 మరియు 2024 సంవత్సరాల్లో ‘బెస్ట్ బయర్స్ ఏజెన్సీ’ విభాగంలో ఫైనలిస్ట్‌గా కూడా నిలిచింది.
ఆస్తులు ఎక్కడ ఉన్నాయి?
న్యూ సౌత్ వేల్స్, విక్టోరియా, సౌత్ ఆస్ట్రేలియా, క్వీన్స్‌లాండ్ మరియు వెస్ట్రన్ ఆస్ట్రేలియా అంతటా ఆయనకు ఆస్తులు ఉన్నాయి. సిడ్నీలో మాత్రం ఆయనకు ఒకటి రెండు ఇళ్లు మాత్రమే ఉన్నాయి.
అద్దె ఇంట్లోనే ఎందుకు? – ‘రెంట్‌వెస్టింగ్’ (Rentvesting) వ్యూహం:
రవి శర్మ సిడ్నీలోని మాక్వారీ పార్క్ ప్రాంతంలో త్రీ-బెడ్‌రూమ్ పెంట్‌హౌస్‌లో అద్దెకు ఉంటున్నారు. దీని కోసం ఆయన వారానికి సుమారు 1420 డాలర్లు (దాదాపు రూ. 1.18 లక్షలు) అద్దె చెల్లిస్తారు. ఈ వ్యూహాన్ని ‘రెంట్‌వెస్టింగ్’ అంటారు. అంటే:
- మనకు నచ్చిన ఖరీదైన లొకేషన్‌లో అద్దెకు ఉంటూ..
- తక్కువ ధర ఉన్న లేదా భవిష్యత్తులో మంచి లాభాలు ఇచ్చే ప్రాంతాల్లో ఇళ్లను కొని పెట్టుబడిగా పెట్టడం.
రవి శర్మ మాటల్లో కారణాలు:
రవి శర్మ తన 21వ ఏట మొదటి ఇల్లు కొన్నారు. గత పదేళ్లలో ఆయన ఆస్ట్రేలియాలోని వివిధ ప్రాంతాల్లో ఇళ్లను కొంటూ వాటిని అద్దెకు ఇస్తూ తన పెట్టుబడులను పెంచుకున్నారు. ఆయన అద్దెకు ఉండటానికి ప్రధాన కారణాలు:
- పెట్టుబడి సామర్థ్యం: సిడ్నీలో నివసించడానికి సొంత ఇల్లు కొనాలంటే భారీ మొత్తంలో డౌన్ పేమెంట్ కట్టాలి. అదే డబ్బును వేరే ప్రాంతాల్లో ఒకటి కంటే ఎక్కువ ఇళ్లపై పెట్టుబడిగా పెడితే ఎక్కువ లాభాలు వస్తాయి.
- ఫ్లెక్సిబిలిటీ: ఒకే ఇంట్లో భారీ డబ్బును లాక్ చేయడం వల్ల భవిష్యత్తులో పెట్టుబడి అవకాశాలు తగ్గుతాయి. స్టాంప్ డ్యూటీ ఖర్చులు కూడా నష్టాన్ని మిగిల్చవచ్చు.
- మెరుగైన ఎదుగుదల: తక్కువ వృద్ధి ఉన్న ప్రాంతంలో ఇల్లు కొని అందులో ఉండటం కంటే, వేగంగా ధరలు పెరిగే ప్రాంతాల్లో పెట్టుబడి పెట్టడమే తెలివైన పని అని ఆయన నమ్ముతారు.
రవి శర్మ ‘పర్సనల్ ఫైనాన్స్ విత్ రవి శర్మ’ పేరుతో యూట్యూబ్ ఛానెల్ కూడా నడుపుతున్నారు. దీనికి లక్షకు పైగా సబ్‌స్క్రైబర్లు ఉన్నారు.