శామ్లీ (యూపీ): మూడు రోజుల క్రితం అనుమానాస్పద స్థితిలో ఓ వివాహిత మరణించిన కేసులో పోలీసులు సంచలన నిజాలను వెలుగులోకి తెచ్చారు. ఎస్పీ తెలిపిన వివరాల ప్రకారం.. కోడలితో అక్రమ సంబంధం పెట్టుకోవాలని మామ ప్రయత్నించగా, ఆమె నిరాకరించినందుకే మామ మరియు భర్త కలిసి ఆమెను గొంతు నులిమి చంపారు.
ఈ ఘాతుకానికి పాల్పడటంలో మృతురాలి భర్త కూడా పాలుపంచుకున్నాడు. హత్యకు ముందు మామ ఒక పన్నాగం పన్నాడు. కోడలికి నమ్మకం కలిగించడానికి ఆమె మాజీ ప్రేమికుడిని కలవడానికి అనుమతి ఇచ్చాడు. ఆ తర్వాత ఆ సంబంధాన్ని సాకుగా చూపి ఆమెను బ్లాక్ మెయిల్ చేసి లొంగదీసుకోవాలని చూశాడు. హత్యను ఆత్మహత్యగా చిత్రీకరించడానికి గది లోపల గడియ వేసి, కిటికీ ద్వారా తీగ సాయంతో తలుపులు మూసి బయట నుండి నాటకమాడారు.
అసలేం జరిగిందంటే?
ఎస్పీ నరేంద్ర ప్రతాప్ సింగ్ తెలిపిన వివరాల ప్రకారం.. కైరానా పోలీసులు మృతురాలు మష్కురా కుటుంబ సభ్యుల ఫిర్యాదు మేరకు నిందితులైన మామ అబ్బాస్ మరియు భర్త సల్మాన్‌లను అరెస్ట్ చేశారు. సల్మాన్‌కు రెండేళ్ల క్రితం మష్కురాతో వివాహం జరిగింది. సల్మాన్ పంజాబ్‌లోని లూథియానాలో కూలీగా పనిచేస్తుండగా, ఇంట్లో మామ అబ్బాస్, కోడలు మష్కురా ఉండేవారు. కోడలిపై మామ దుర్బుద్ధితో ప్రవర్తించేవాడు.
ఆమెకు గతంలో ఉన్న ప్రేమికుడు జాబిద్‌ను కావాలని ఇంటికి పిలిపించి, వారిద్దరినీ కలవనిచ్చాడు. ఫిబ్రవరి 16న కూడా జాబిద్ వచ్చి వెళ్లిన తర్వాత, రాత్రి సమయంలో అబ్బాస్ తన కోడలిపై లైంగిక దాడికి ప్రయత్నించాడు. ఆమె ప్రతిఘటించడంతో, ఈ విషయాన్ని తన కొడుకు సల్మాన్‌కు ఫోన్లో చెప్పి ఇద్దరూ కలిసి ఆమెను అంతమొందించాలని పథకం వేశారు. ఈ క్రమంలోనే అబ్బాస్ ఆమెను గొంతు నులిమి చంపేశాడు.
భార్య ప్రేమికుడికి మద్యం తాగించి.. తాడుతో ఉరి బిగించి హత్య
మరో ఘటనలో, ఉత్తరప్రదేశ్‌లోని బాగ్పత్ ప్రాంతంలో ఒక వ్యక్తి తన భార్య ప్రేమికుడిని తాడుతో ఉరి బిగించి చంపేశాడు. హత్య చేసిన తర్వాత మృతదేహాన్ని ఇంటి బయట ఉన్న అరుగుపై పడేసి వెళ్లిపోయాడు.
వివరాలు: బామ్నౌలీ నివాసి లోకేంద్ర కశ్యప్ (36) మృతదేహం తన పొరుగున ఉన్న హరిదర్శన్ ఇంటి బయట అరుగుపై కనిపించింది. దీనిపై మృతుని సోదరుడు జోగేంద్ర పోలీసులకు ఫిర్యాదు చేశాడు. బుధవారం సాయంత్రం హరిదర్శన్, లోకేంద్ర కలిసి మద్యం తాగారని, ఆ తర్వాతే హరిదర్శన్ అతడిని తాడుతో గొంతు నులిమి చంపాడని ఆరోపించాడు. లోకేంద్ర హరిదర్శన్ భార్యతో మాట్లాడటం నచ్చని కారణంగానే హరిదర్శన్ ఈ దారుణానికి ఒడిగట్టాడు. పోలీసులు నిందితుడు హరిదర్శన్‌ను అరెస్ట్ చేసి దర్యాప్తు చేస్తున్నారు.