అమెరికాలో ఒక భారత సంతతి వ్యక్తి కరణ్ గుప్తా (47), తాను పనిచేస్తున్న కంపెనీ నుండి దాదాపు $1.2 మిలియన్లు (సుమారు ₹11 కోట్లు) కాజేసినట్లు నిర్ధారణ కావడంతో కోర్టు అతడిని దోషిగా తేల్చింది.
కుంభకోణం ఎలా జరిగింది? మినెసోటాకు చెందిన ‘యునైటెడ్ హెల్త్ గ్రూప్’ అనుబంధ సంస్థ అయిన ‘ఆప్టమ్’ (Optum) లో కరణ్ గుప్తా సీనియర్ డైరెక్టర్‌గా పనిచేసేవాడు. అతని వార్షిక జీతం $260,000 (సుమారు ₹2.3 కోట్లు). అయితే, మరింత డబ్బు సంపాదించాలనే దురాశతో 2015లో అతను ఒక పథకం వేశాడు. అర్హత లేని తన ప్రాణ స్నేహితుడికి ఒక నకిలీ రెజ్యూమేని తయారు చేసి, అదే కంపెనీలో డేటా ఇంజనీరింగ్ మేనేజర్‌గా ఉద్యోగం ఇప్పించాడు.
పని చేయకుండానే లక్షల జీతం: ఆ స్నేహితుడికి కరణ్ గుప్తానే నేరుగా బాస్. దీంతో ఆ స్నేహితుడు దాదాపు నాలుగేళ్లపాటు కంపెనీలో ఏ పనీ చేయలేదు. కనీసం ఎవరినీ కలవలేదు, ఈమెయిల్స్ పంపలేదు, కొన్ని వారాల పాటు కంప్యూటర్ కూడా లాగిన్ చేయలేదు. అయినప్పటికీ, కరణ్ పుణ్యమా అని అతనికి లక్షల డాలర్ల జీతం, బోనస్‌లు అందుతూనే ఉన్నాయి.
కిక్‌బ్యాక్ స్కీమ్ (డబ్బు వాటా): అయితే, ఆ స్నేహితుడికి వచ్చే జీతంలో సగానికి పైగా సొమ్మును కరణ్ గుప్తా ‘కిక్‌బ్యాక్’ రూపంలో తిరిగి తీసుకునేవాడు. ఈ లావాదేవీలను దాచడానికి వారు రకరకాల పద్ధతులు పాటించారు.
- మొదట, న్యూజెర్సీలో ఉండే స్నేహితుడు తన అకౌంట్ నుండి నగదు తీసి, కరణ్ అకౌంట్ ఉన్న బ్యాంక్ బ్రాంచ్‌లో డిపాజిట్ చేసేవాడు. దీనివల్ల కాలిఫోర్నియాలో ఉన్న కరణ్ ఆ డబ్బును సులభంగా డ్రా చేసుకునేవాడు.
- తర్వాత, ఆ స్నేహితుడు ఒక కొత్త డెబిట్ కార్డును కరణ్‌కు ఇచ్చేశాడు. కరణ్ దానిని వాడుతూ కాలిఫోర్నియాలోని ATMల నుండి నేరుగా డబ్బు డ్రా చేసేవాడు.
బయటపడిందిలా: 2019 చివరిలో కరణ్ గుప్తా మరో కుంభకోణానికి పాల్పడటంతో కంపెనీ అతడిని తొలగించింది. ఆ తర్వాత జరిపిన అంతర్గత విచారణలో ఈ “ఘోస్ట్ ఎంప్లాయీ” (ఉనికిలో లేని ఉద్యోగి) వ్యవహారం బయటపడింది. FBI దర్యాప్తులో అన్ని విషయాలు వెలుగులోకి వచ్చాయి.