భారతదేశంలో వివాహం అంటేనే విలాసవంతమైన వేదికలు, వందలాది మంది అతిథులు మరియు ఆడంబరమైన వేడుకలకు నిలయం. కానీ, ఐఏఎస్ అధికారి మాధవ్ భరద్వాజ్ మాత్రం ఇందుకు భిన్నంగా అత్యంత నిరాడంబరమైన మార్గాన్ని ఎంచుకున్నారు.
ఈ యువ అధికారి రాజస్థాన్‌లోని ఒక కోర్టు గదిలో తన తోటి ఐఏఎస్ అధికారి అదితి వర్ష్ణేను పెళ్లి చేసుకున్నారు. ఎటువంటి ఆర్భాటాలు లేకుండా కేవలం అర్థవంతంగా ఈ వేడుకను ముగించి అందరి ప్రశంసలు అందుకుంటున్నారు.
రాజస్థాన్‌లోని అల్వార్‌లో ఉన్న మినీ సెక్రటేరియట్‌లో వీరి వివాహ రిజిస్ట్రేషన్ జరిగింది. ప్రస్తుతం మాధవ్ అక్కడే సబ్ డివిజనల్ మెజిస్ట్రేట్ (SDM)గా పనిచేస్తున్నారు. జిల్లా కలెక్టర్ అర్పితా శుక్లా సమక్షంలో ఈ వేడుక జరిగింది. ఎటువంటి అలంకరణలు, బ్యాండ్ బాజాలు లేకుండా కేవలం ఇరు కుటుంబాల తల్లిదండ్రులు, తోబుట్టువుల మధ్య కలెక్టర్ చాంబర్‌లోనే వీరిద్దరూ పూలదండలు మార్చుకున్నారు.
ఎవరీ మాధవ్ భరద్వాజ్?
మాధవ్ భరద్వాజ్ 2023 బ్యాచ్‌కు చెందిన ఐఏఎస్ అధికారి. 2022 యూపీఎస్సీ సివిల్ సర్వీసెస్ పరీక్షలో లోకోమోటర్ డిజెబిలిటీ (Locomotor Disability) కేటగిరీ కింద ఆల్ ఇండియా 536వ ర్యాంకు సాధించారు. ఐఐఎం అహ్మదాబాద్ (IIM Ahmedabad) నుండి ఎంబీఏ పట్టా పొందిన ఆయన, గతంలో మైక్రోసాఫ్ట్ కంపెనీలో పనిచేశారు. శారీరక సవాళ్లను అధిగమించి సివిల్స్ సాధించిన ఆయన ప్రయాణం ఎంతో మందికి స్ఫూర్తిదాయకం. ప్రస్తుతం ఆయన రాజస్థాన్‌లోని అల్వార్‌లో ఎస్డీఎంగా పనిచేస్తున్నారు.
ఎవరీ అదితి వర్ష్ణే?
అదితి వర్ష్ణే కూడా 2023 ఐఏఎస్ బ్యాచ్‌కే చెందినవారు. ఆమె 2022 యూపీఎస్సీ పరీక్షలో మొదటి ప్రయత్నంలోనే ఆల్ ఇండియా 57వ ర్యాంకు సాధించి రికార్డు సృష్టించారు. ఢిల్లీలోని మిరాండా హౌస్ పూర్వ విద్యార్థిని అయిన ఆమె, ఉత్తరప్రదేశ్‌లోని బరేలీకి చెందినవారు. ప్రస్తుతం ఆమె గుజరాత్‌లోని జామ్‌నగర్‌లో ఎస్డీఎంగా బాధ్యతలు నిర్వర్తిస్తున్నారు.
వీరి ప్రేమకథ:
మాధవ్ మరియు అదితి ఐఏఎస్ శిక్షణ (LBSNAA) సమయంలో కలుసుకున్నారు. మొదట స్నేహితులుగా ఉన్న వీరు, పెద్దల అంగీకారంతో తమ బంధాన్ని వివాహంగా మార్చుకున్నారు. ఆడంబరాల కంటే సాదాసీదాగా ఉండటానికే ఇష్టపడే వీరు, రిజిస్టర్ మ్యారేజ్ చేసుకోవాలని నిర్ణయించుకున్నారు.
పెళ్లిళ్ల కోసం కోట్లాది రూపాయలు ఖర్చు చేస్తున్న నేటి కాలంలో, వీరి నిర్ణయం సమాజానికి ఒక మంచి సందేశాన్ని ఇస్తోంది.