ఇంగ్లాండ్‌లోని నార్తంబర్‌ల్యాండ్ తీరంలో దొరికిన ఒక చిన్న రాయి ఇప్పుడు ప్రపంచ దేశాల దృష్టిని ఆకర్షించింది. చూడటానికి అచ్చం ఒక మనిషి నవ్వుతున్నట్లు, వరుసగా పళ్లు ఉన్నట్లుగా కనిపించే ఈ వింత రాయిని హోలీ ఐలాండ్ తీరంలో నడుస్తున్న 64 ఏళ్ల క్రిస్టిన్ క్లార్క్ అనే మహిళ కనుగొన్నారు.
“ఇసుకలో పడి ఉన్న ఈ రాయిని చూస్తే ఎవరో పళ్ల సెట్ (dentures) పారేసుకున్నట్లు ఉంది, నన్ను చూసి అది నవ్వుతున్నట్లే అనిపించింది” అని ఆమె ఆశ్చర్యంగా చెప్పారు. ఆమె దీనిని సోషల్ మీడియాలో పోస్ట్ చేయడంతో అది కాస్తా వైరల్ అయ్యింది. వెంటనే రంగంలోకి దిగిన బ్రిటిష్ జియోలాజికల్ సర్వే (BGS) నిపుణులు దీని వెనుక ఉన్న రహస్యాన్ని వెల్లడించారు.
అసలు రహస్యం ఏమిటి? నిజానికి ఇది సాధారణ రాయి కాదు; సుమారు 35 కోట్ల ఏళ్ల క్రితం సముద్రంలో నివసించిన ‘క్రినాయిడ్’ (Crinoid) అనే ఒక రకమైన సముద్ర జీవి యొక్క శిలాజం (Fossil).
వీటిని ‘సీ లిల్లీస్’ (Sea Lilies) అని కూడా పిలుస్తారు. ఈ జీవి యొక్క కాండం (stem) భాగం మిలియన్ల సంవత్సరాల క్రితం ముక్కలై, కాలక్రమేణా శిలాజంగా మారడం వల్ల అది చూడటానికి మనిషి నవ్వుతున్న నోటి ఆకారాన్ని పొందింది.
దాదాపు 50 కోట్ల ఏళ్ల చరిత్ర ఉన్న ఈ జీవులు, భూమిపై అత్యంత పురాతన జంతువులలో ఒకటిగా పరిగణించబడతాయి. స్థానికులు దీనిని ‘దేవుని పూసలు’ (God’s beads) అని పవిత్రంగా భావిస్తారు. ఈ ‘నవ్వుతున్న శిలాజం’ ఇప్పుడు శాస్త్రవేత్తలను మరియు సాధారణ ప్రజలను అమితంగా ఆశ్చర్యపరుస్తోంది.