బెంగళూరు: కర్ణాటకలో బీజేపీకి తీవ్ర అవమానం కలిగించేలా, గదగ్ జిల్లా శిరహట్టి ఎమ్మెల్యే డాక్టర్ చంద్రు లమాణి ఒక కాంట్రాక్టర్ నుండి లంచం తీసుకుంటూ లోకాయుక్త పోలీసులకు దొరికిపోయారు.
ఎమ్మెల్యే ఆసుపత్రిలోనే లంచం బట్వాడా: శనివారం మధ్యాహ్నం, కాంట్రాక్టర్ విజయ్ పూజారాను లంచం మొత్తంలో భాగంగా ₹5 లక్షలను గదగ్ జిల్లా లక్ష్మేశ్వరంలోని డాక్టర్ చంద్రు లమాణికి చెందిన బాలాజీ ఆసుపత్రికి తీసుకురావాలని కోరారు. విజయ్ పూజారా ఆ డబ్బును ఎమ్మెల్యే పిఏ (PA) గురు లమాణికి అందజేస్తుండగా, లోకాయుక్త పోలీసులు ఇద్దరినీ అదుపులోకి తీసుకున్నారు. పోలీసులను చూసిన గురు లమాణి ₹50,000 ఆసుపత్రి బయట పడవేసి, మిగిలిన ₹4.5 లక్షలను ఆసుపత్రిలోని మెడికల్ షాపులో దాచిపెట్టాడు. లోకాయుక్త పోలీసులు డాక్టర్ చంద్రు లమాణిని ప్రజా ప్రతినిధుల ప్రత్యేక కోర్టులో హాజరుపరచనున్నారు.
బిజెపి మౌనం – కాంగ్రెస్ విమర్శలు: ఈ ఘటనతో ఇరకాటంలో పడ్డ బిజెపి దీనిపై మౌనం వహించింది. బిజెపి రాష్ట్ర అధ్యక్షుడు బి.వై. విజయేంద్ర మాట్లాడుతూ.. తనకు ఇప్పుడే సమాచారం అందిందని, పూర్తి వివరాలు తెలుసుకున్న తర్వాత స్పందిస్తానని చెప్పారు. ఉప ముఖ్యమంత్రి డి.కె. శివకుమార్ స్పందిస్తూ, ఎప్పుడూ నీతి నిజాయితీ గురించి మాట్లాడే బిజెపి ఎమ్మెల్యేల అసలు రంగు ఇదేనని ఎద్దేవా చేశారు.
మరోవైపు, డాక్టర్ చంద్రు స్వగ్రామమైన లక్ష్మేశ్వరంలో ఉద్రిక్తత నెలకొంది. ఆయన మద్దతుదారులు వీధుల్లోకి వచ్చి అధికార కాంగ్రెస్ పార్టీకి వ్యతిరేకంగా నినాదాలు చేశారు. ఇది కాంగ్రెస్ కుట్ర అని, కావాలనే తమ నాయకుడిని ఇరికించారని వారు ఆరోపిస్తున్నారు.