గతంలో బైపాస్ సర్జరీ చేయించుకున్న ప్రతి ఒక్కరికీ సాధారణ పరీక్షగా (Routine) ఆంజియోగ్రామ్ చేయాల్సిన అవసరం లేదు. కానీ, కొన్ని ప్రత్యేక పరిస్థితుల్లో మాత్రం ఇది తప్పనిసరి అవుతుంది.
ఆంజియోగ్రామ్ ఎప్పుడు అవసరం?
- సర్జరీ తర్వాత మళ్ళీ ఛాతీ నొప్పి (Chest Pain) వస్తున్నా.
- నడుస్తున్నప్పుడు ఆయాసం లేదా ఛాతీ నొప్పితో పాటు ఎడమ చేయి, భుజం, వీపు లేదా దవడలో నొప్పి అనిపిస్తున్నా.
- ECG లేదా Echo పరీక్షల్లో గుండె పంపింగ్ సామర్థ్యం తగ్గినట్లు తెలిసినా.
- TMT (Treadmill Test) లేదా స్ట్రెస్ ఎకో పరీక్షల్లో రక్త ప్రసరణలో మార్పులు గమనించినా.
- రక్త పరీక్షల్లో ‘ట్రోపోనిన్ ఐ’ (Troponin I) పాజిటివ్ అని వచ్చినా ఆంజియోగ్రామ్ అవసరం కావచ్చు.
రక్త నాళాల (Grafts) రకాలు – జాగ్రత్తలు: బైపాస్ సర్జరీలో వాడే రక్త నాళాలు రెండు రకాలు:
- ఆర్టీరియల్ గ్రాఫ్ట్ (LIMA): ఛాతీ భాగం నుండి తీసే ఈ నాళాల్లో బ్లాక్స్ వచ్చే అవకాశం చాలా తక్కువ (10-15 ఏళ్లలో కేవలం 5-10% మందికి మాత్రమే వస్తాయి).
- వీనస్ గ్రాఫ్ట్: కాళ్ళ నుండి తీసే ఈ నాళాల్లో బ్లాక్స్ వచ్చే అవకాశం ఎక్కువ. 10 ఏళ్లలో దాదాపు 50% మందికి మళ్ళీ సమస్య వచ్చే అవకాశం ఉంది.
డయాబెటిస్, బీపీ, పొగత్రాగే అలవాటు ఉన్నవారికి మళ్ళీ బ్లాక్స్ వచ్చే రిస్క్ ఎక్కువ. ఎటువంటి నొప్పి లేకుండా, ECG మరియు Echo రిపోర్టులు సాధారణంగా ఉంటే ఆంజియోగ్రామ్ అవసరం లేదు.