మధుమేహ వ్యాధిగ్రస్తులు డిజైనర్ రైస్ తింటే రక్తంలో చక్కెర స్థాయిలు పెరగవు. అసలు ఈ డిజైనర్ రైస్ అంటే ఏమిటో తెలుసుకోండి. ఇది మేము చెబుతున్న మాట కాదు, కేంద్ర సైన్స్ అండ్ టెక్నాలజీ సంస్థ వెల్లడించిన నిజం.
డిజైనర్ రైస్ ప్రత్యేకతలు: తిరువనంతపురంలోని CSIR-NIIST పరిశోధకులు ఈ ప్రత్యేక బియ్యాన్ని అభివృద్ధి చేశారు. ఇది చూడటానికి, రుచికి సాధారణ బియ్యం లాగే ఉంటుంది. కానీ, ఇందులో ప్రోటీన్ స్థాయిలు (20% లేదా అంతకంటే ఎక్కువ) ఎక్కువగా ఉంటాయి.
- తక్కువ గ్లైసెమిక్ ఇండెక్స్ (Low GI): సాధారణ తెల్ల బియ్యం GI 70 కంటే ఎక్కువ ఉంటుంది. కానీ ఈ డిజైనర్ రైస్ GI 54 కంటే తక్కువ. దీనివల్ల భోజనం చేసిన తర్వాత రక్తంలో చక్కెర స్థాయిలు ఒక్కసారిగా పెరగవు.
- పోషకాల గని: ఇందులో ఐరన్, ఫోలిక్ యాసిడ్, విటమిన్ B12 వంటి సూక్ష్మ పోషకాలను చేర్చారు. ఇది రక్తహీనత మరియు పోషకాహార లోపాన్ని పోగొట్టడానికి సహాయపడుతుంది.
ఇది ఎలా తయారవుతుంది? ఇది జన్యుమార్పిడి (GMO) చేసిన బియ్యం కాదు. బియ్యం పిండితో అవసరమైన పోషకాలను కలిపి, అత్యాధునిక ఫుడ్ ప్రాసెసింగ్ టెక్నాలజీ ద్వారా తిరిగి బియ్యం గింజల ఆకారంలోనే తయారు చేస్తారు. దీనిని కడిగినా లేదా వండినా పోషకాలు నశించవు. టాటా కన్స్యూమర్ ప్రొడక్ట్స్ వంటి సంస్థలు త్వరలోనే దీనిని మార్కెట్లోకి తీసుకురానున్నాయి.