మెక్సికోలోని బిజీగా ఉండే గ్వాడలజరా అంతర్జాతీయ విమానాశ్రయంలో ఆదివారం (ఫిబ్రవరి 22) నాడు భీకరమైన హింస చెలరేగింది. డ్రగ్ కార్టెల్ ముఠా సభ్యులు విచక్షణారహితంగా కాల్పులు జరపడంతో ప్రయాణికులు ప్రాణభయంతో పరుగులు తీశారు.
సోషల్ మీడియాలో వైరల్ అవుతున్న వీడియోల ప్రకారం.. ప్రయాణికులు తమ సామాను పట్టుకుని విమానాశ్రయం తలుపుల గుండా పరిగెత్తుతుండగా, మరికొందరు కౌంటర్ల వెనుక దాక్కుని ప్రాణాలు కాపాడుకోవడానికి ప్రయత్నించారు. సాయుధ ముఠా సభ్యులు విమానాశ్రయ భవనం లోపల కాల్పులు జరుపుతూ బీభత్సం సృష్టించారు. ‘జాలిస్కో న్యూ జనరేషన్ కార్టెల్’ (CJNG) సభ్యులు ఈ దాడికి పాల్పడినట్లు సమాచారం. వీరు విమానాశ్రయం వెలుపల కార్లు, బస్సులను కూడా తగులబెట్టారు.
జాలిస్కో రాష్ట్రవ్యాప్తంగా అల్లర్లు: ఈ హింసాకాండ గ్వాడలజరాకే పరిమితం కాకుండా ప్రసిద్ధ పర్యాటక ప్రాంతమైన ‘ప్యూర్టో వల్లర్టా’ మరియు జాలిస్కో రాష్ట్రంలోని ఇతర ప్రాంతాలకు వ్యాపించింది. మెక్సికో సైన్యం జరిపిన ఆపరేషన్‌లో CJNG నాయకుడు ‘నెమెసియో రుబెన్ ఒసెగ్వెరా సెర్వంటెస్’ (ఎల్ మెంచో) హతమయ్యాడు. దీనికి ప్రతీకారంగానే ఈ దాడులు జరుగుతున్నాయి. 53 ఏళ్ల ఎల్ మెంచో డ్రగ్స్ స్మగ్లింగ్ కేసులో అమెరికాకు కూడా మోస్ట్ వాంటెడ్ నేరస్థుడు. అతనిపై గతంలో $15 మిలియన్ల భారీ రివార్డు కూడా ఉంది.
వ్యాపారాలు మూసివేత.. స్కూళ్లకు సెలవు: ప్యూర్టో వల్లర్టాలో డజన్ల కొద్దీ దుకాణాలు మరియు వ్యాపార సంస్థలకు నిప్పు పెట్టారు. పర్యాటకులు తమ ప్రాణాలను అరచేతిలో పెట్టుకుని హోటల్ గదులకే పరిమితమయ్యారు. పరిస్థితి విషమించడంతో అధికారులు సోమవారం (ఫిబ్రవరి 23) నాడు పాఠశాలలకు సెలవు ప్రకటించారు.