అర్జెంటీనా: సుమారు 70 మిలియన్ ఏళ్ల క్రితం భూమిపై జీవించిన ఒక మాంసాహార డైనోసార్‌కు చెందిన సంపూర్ణమైన గుడ్డును అర్జెంటీనా శాస్త్రవేత్తలు కనుగొన్నారు.
దక్షిణ అమెరికా చరిత్రలోనే ఒక మాంసాహార రకానికి చెందిన డైనోసార్ గుడ్డు ఇంత పూర్తిస్థాయిలో, ఎక్కడా పాడవకుండా లభించడం ఇదే మొదటిసారి. ఇది ప్రపంచవ్యాప్త శాస్త్రవేత్తలలో గొప్ప ఆశ్చర్యాన్ని కలిగిస్తోంది. అర్జెంటీనా నేచురల్ సైన్స్ మ్యూజియంకు చెందిన పరిశోధకులు ఫెడెరికో అగ్నోలిన్ మరియు మటియాస్ మోట్టా నేతృత్వంలోని బృందం ‘సాలిట్రల్ ఓజో డి అగువా’ ప్రాంతంలో జరిపిన పరిశోధనల్లో ఈ అరుదైన గుడ్డు బయటపడింది.
ఈ గుడ్డు విశేషాలు: ఇది క్రెటేషియస్ కాలం చివరి నాటిదని అంచనా. సాధారణంగా పొడవైన మెడ ఉండే ‘సౌరోపాడ్’ రకం డైనోసార్ల గుడ్లు గుండ్రంగా, మందపాటి పెంకుతో ఉంటాయి. కానీ, ఇప్పుడు దొరికిన ఈ గుడ్డు ఆధునిక పక్షుల గుడ్ల మాదిరిగా ‘ఓవల్’ (దీర్ఘవృత్తాకార) ఆకృతిలో ఉంది. దీనిపై ఉన్న విభిన్న గుర్తులను బట్టి, ఇది మనకు ఇప్పటివరకు తెలియని ఒక కొత్త రకానికి చెందిన మాంసాహార డైనోసార్ అయి ఉండవచ్చని పరిశోధకులు భావిస్తున్నారు.
పిండం రహస్యం: ఈ ఆవిష్కరణలో అత్యంత ముఖ్యమైన విషయం ఏమిటంటే, ఆ గుడ్డు లోపల 70 మిలియన్ ఏళ్ల నాటి ‘డైనోసార్ పిండం’ (embryo) ఉండే అవకాశం ఉంది. గుడ్డు లోపల పిండం యొక్క అస్థిపంజరం ఉందో లేదో నిర్ధారించడానికి ఈ ఏడాది చివరిలోగా ‘మైక్రో-సిటి స్కేన్’ చేయాలని శాస్త్రవేత్తలు నిర్ణయించారు. ఒకవేళ పూర్తి పిండం లేకపోయినా, అందులోని ఎముకల శిధిలాల ద్వారా ఆ డైనోసార్ శ్వాస వ్యవస్థ, శారీరక పెరుగుదల మరియు దాని ఆకృతి గురించి అనేక రహస్యాలను తెలుసుకోవచ్చు.
పక్షుల పరిణామక్రమంపై కొత్త వెలుగు: గుడ్డు లభించిన ప్రాంతంలోనే ‘రోకాసారస్ మునియోసి’ అనే టైటానోసార్ శిలాజాలు కూడా లభించాయి. దీన్ని బట్టి ఆ ప్రాంతం డైనోసార్లు గుడ్లు పెట్టి జీవించే స్థావరం (nesting site) అని అర్థమవుతోంది. పాకే జంతువుల (reptiles) నుండి ఆధునిక పక్షులు ఎలా పరిణామం చెందాయో అర్థం చేసుకోవడానికి ఇది ఒక ముఖ్యమైన వారధిగా మారుతుంది. సాధారణంగా ఇటువంటి పరిశోధనలు నివేదికలు ప్రచురించబడిన తర్వాతే బయటకు వస్తాయి, కానీ ‘డిస్కవర్’ పత్రిక ప్రకారం, ఈ ఫలితాలను ప్రత్యక్ష ప్రసారం ద్వారా శాస్త్రవేత్తలకు మరియు ప్రజలకు ఒకేసారి తెలియజేశారు.