ఫ్లోరిడాలోని డొనాల్డ్ ట్రంప్‌కు చెందిన రిసార్ట్ (మార్-ఎ-లాగో) లోకి తుపాకీతో ప్రవేశించడానికి ప్రయత్నించిన ఒక యువకుడు భద్రతా అధికారుల కాల్పుల్లో మరణించాడు.
అమెరికా కాలమానం ప్రకారం ఆదివారం తెల్లవారుజామున 1:30 గంటల సమయంలో, సుమారు 20 ఏళ్ల వయస్సున్న ఒక యువకుడు తుపాకీ మరియు ఇంధనం (Fuel can) తో రిసార్ట్‌లోకి చొరబడటానికి ప్రయత్నించాడు. అక్కడి భద్రతా అధికారులు అతడిని అడ్డుకుని, ఆయుధాలను కింద పడవేయాలని హెచ్చరించారు.
అయితే, ఆ యువకుడు అధికారులపైనే కాల్పులు జరపడానికి ప్రయత్నించినట్లు సమాచారం. దీంతో ఆత్మరక్షణ కోసం భద్రతా అధికారులు అతడిని కాల్చి చంపారు. ఈ ఘటన జరిగిన సమయంలో డొనాల్డ్ ట్రంప్ ఆ నివాసంలో లేరు.
అధికారుల వివరాల ప్రకారం.. మరణించిన యువకుడిని నార్త్ కరోలినాకు చెందిన ఆస్టిన్ డి మార్టిన్ గా గుర్తించారు. గత శనివారం నుండి అతను కనిపించడం లేదని కుటుంబ సభ్యులు ఫిర్యాదు చేశారు. ట్రంప్ రిసార్ట్‌లోకి అతను ఎందుకు చొరబడాలనుకున్నాడు అనే కోణంలో అధికారులు దర్యాప్తు చేస్తున్నారు.