భారతదేశం విభిన్నత్వంలో ఏకత్వం ఉన్న దేశమని, ఇక్కడ అన్ని సంస్కృతులను గౌరవిస్తారని చెబుతుంటారు. కానీ, అదే దేశంలో సొంత ప్రజలే వివక్షకు గురవుతుండటం శోచనీయం. అప్పుడప్పుడు వెలుగులోకి వచ్చే కొన్ని ఘటనలు మనల్ని దిగ్భ్రాంతికి గురిచేస్తాయి.
తాజాగా దేశ రాజధాని ఢిల్లీలో అటువంటి ఘటనే ఒకటి వెలుగులోకి వచ్చింది. దీనికి సంబంధించిన వీడియో సోషల్ మీడియాలో వైరల్ అవుతోంది. అరుణాచల్ ప్రదేశ్‌కు చెందిన ముగ్గురు యువతులను ‘వ్యభిచారం చేసేవారు’, ‘మసాజ్ చేసేవారు’ అంటూ అసభ్య పదజాలంతో దూషించారు. అసలు ఏం జరిగిందో వివరంగా చూద్దాం.
మాలవీయ నగర్ ఘటన: అసలేం జరిగింది? ఢిల్లీలోని మాలవీయ నగర్ ప్రాంతంలో నివసిస్తున్న అరుణాచల్ ప్రదేశ్‌కు చెందిన ముగ్గురు మహిళలపై ఒక దంపతులు జాత్యహంకార వ్యాఖ్యలు చేశారు. బాధితుల ఫిర్యాదు మేరకు పోలీసులు నిందితులపై సంబంధిత సెక్షన్ల కింద కేసు నమోదు చేసి దర్యాప్తు ప్రారంభించారు. పోలీసులు అక్కడే ఉన్నప్పటికీ, నిందితులు ఆ మహిళలను దూషిస్తూనే ఉన్నట్లు వీడియోలో కనిపిస్తోంది.
బాధితురాలు ఏం చెప్పింది? బాధితురాలు తెలిపిన వివరాల ప్రకారం.. వేసవి కాలం వస్తున్నందున వారు తమ అపార్ట్‌మెంట్‌లో ఏసీ (AC) బిగిస్తున్నారు. ఆ సమయంలో డ్రిల్లింగ్ చేస్తుండగా వచ్చిన కొంత దుమ్ము కింద ఉన్న పొరుగువారి బాల్కనీలో పడింది. దీంతో ఆ దంపతులు పైకి వచ్చి మెకానిక్‌తో గొడవకు దిగారు. బాధితులు సర్దిచెప్పడానికి ప్రయత్నించగా, వారు మరింత రెచ్చిపోయి అసభ్యకరమైన వ్యాఖ్యలు చేశారు.
“మీరు మసాజ్ పార్లర్లలో పని చేస్తారు. 500 రూపాయలకే ఎవరితోనైనా పడుకుంటారు. కావాలంటే నా భర్తతో పడుకో, మీకు 500 ఇస్తాను” అంటూ అత్యంత అసహ్యంగా మాట్లాడారు. అంతేకాకుండా వారిని ‘ధందే వాలీ’ (వ్యభిచారం చేసేవారు), ‘ఒక ప్లేట్ మోమో తీసుకురా’ అంటూ జాతి వివక్షతో దూషించినట్లు బాధితులు వాపోయారు.