తమిళనాడు విరుదునగర్ జిల్లా శివకాశిలో నగలు, డబ్బు కోసం తన స్నేహితురాలనే ఓ వృద్ధురాలు హత్య చేసిన ఘటన కలకలం రేపింది. అది సహజ మరణమని భావించిన బంధువులకు అంత్యక్రియల సమయంలో అసలు విషయం తెలిసి షాక్‌కు గురయ్యారు. ఇంతకీ ఏం జరిగింది?
విరుదునగర్ జిల్లా శివకాశి సమీపంలోని కొంగలాపురం తిరుమలనాయకర్ గ్రామానికి చెందిన 84 ఏళ్ల తాయారమ్మాళ్ రిటైర్డ్ ప్రభుత్వ పాఠశాల ఉపాధ్యాయురాలు. ఆమె ఒంటరిగా నివసిస్తున్నారు. ఆమె కోడలు సమీపంలోనే ఉంటూ పగటిపూట వచ్చి అత్తగారి బాగోగులు చూసుకునేవారు.
గత 11వ తేదీన చాలా సేపటి వరకు తాయారమ్మాళ్ ఇంటి నుండి బయటకు రాకపోవడంతో, అదే ఇంట్లో అద్దెకు ఉంటున్న వ్యక్తి ఆమె కోడలికి సమాచారం ఇచ్చారు. లోపలికి వెళ్లి చూడగా వృద్ధురాలు శవమై పడి ఉంది. వృద్ధాప్యం మరియు అనారోగ్యం కారణంగానే ఆమె మరణించిందని భావించి బంధువులు అంత్యక్రియలకు ఏర్పాట్లు చేశారు.
అయితే, అంత్యక్రియల సమయంలో ఆమె ఒంటిపై ఉండాల్సిన 2 గొలుసులు, కమ్మలు, గాజులు సహా 5 తులాల బంగారు నగలు కనిపించకపోవడంతో బంధువులకు అనుమానం వచ్చింది. ఇల్లంతా వెతికినా నగలతో పాటు ఆమె సెల్‌ఫోన్, నగదు కూడా మాయమైనట్లు గుర్తించారు. దీంతో ఆమె మృతిపై అనుమానం ఉందని పోలీసులకు ఫిర్యాదు చేశారు. పోలీసులు మృతదేహాన్ని స్వాధీనం చేసుకుని పోస్ట్‌మార్టం నిమిత్తం శివకాశి ప్రభుత్వ ఆసుపత్రికి తరలించారు.
పోస్ట్‌మార్టం నివేదికలో ఆమె ఊపిరి ఆడక మరణించినట్లు తేలడంతో పోలీసుల అనుమానం బలపడింది. సీసీటీవీ దృశ్యాలు మరియు సెల్‌ఫోన్ కాల్ డేటాను విశ్లేషించగా, ఘటన జరిగిన రోజు ఆమె మాజీ స్నేహితురాలు జమున కాల్ చేసినట్లు తెలిసింది. కోయంబత్తూరులో తన కుమార్తె ఇంట్లో ఉన్న జమునను పోలీసులు అరెస్ట్ చేసి విచారించగా విస్తుపోయే నిజాలు వెలుగులోకి వచ్చాయి.
10 ఏళ్ల క్రితం జమున తాయారమ్మాళ్ ఇంటి పక్కనే నివసించేది. ఆ పరిచయంతో ఆమె అడపాదడపా వృద్ధురాలి వద్ద అప్పు తీసుకునేది. ఈ క్రమంలోనే గత 10వ తేదీ రాత్రి వృద్ధురాలిని చూడటానికి వచ్చిన జమున అక్కడే బస చేసింది. తనకు అప్పులు ఎక్కువగా ఉన్నాయని, డబ్బు ఇవ్వాలని కోరగా వృద్ధురాలు నిరాకరించింది.
దీంతో అర్ధరాత్రి 2 గంటల సమయంలో గాఢ నిద్రలో ఉన్న తాయారమ్మాళ్ ముఖంపై దిండుతో అదిమి హత్య చేసింది. అనంతరం ఆమె ఒంటిపై ఉన్న 5 తులాల నగలు, వెయ్యి రూపాయల నగదు, సెల్‌ఫోన్ తీసుకుని 3 గంటల ప్రాంతంలో అక్కడి నుండి పరారైంది. సెల్‌ఫోన్ తన వద్ద ఉంటే దొరికిపోతానని భయపడి పక్కనే ఉన్న కాలువలో పారేసింది. పోలీసులు నగలను స్వాధీనం చేసుకుని జమునను జైలుకు తరలించారు.