కోల్‌కతాలోని ఒక ఆశ్రమంలో 25 ఏళ్లుగా నివసిస్తున్న 70 ఏళ్ల వృద్ధురాలు, సుదీర్ఘ పోరాటం తర్వాత తన కొడుకును కనుగొన్నప్పటికీ, మతపరమైన కారణాలతో అతను ఆమెను నిరాకరించడం తీవ్ర విషాదాన్ని నింపింది.
నేపథ్యం: జార్ఖండ్ రాష్ట్రం గోడ జిల్లాకు చెందిన సుశీల ముర్ము (70) భర్త చనిపోయిన తర్వాత, 2001లో అదృశ్యమయ్యారు. ‘మిషనరీస్ ఆఫ్ చారిటీ’ సంస్థ వారు ఆమెను రక్షించి కోల్‌కతాలోని ఆశ్రమానికి చేర్చారు. అప్పట్లో జ్ఞాపకశక్తి కోల్పోయిన ఆమెకు వైద్యులు నిరంతరం చికిత్స అందించారు. ఫలితంగా, ఇటీవల ఆమె తన గ్రామం పేరును గుర్తుకు తెచ్చుకున్నారు.
కొడుకు ఆచూకీ: ఆశ్రమ సిబ్బంది కోల్‌కతాకు చెందిన రేడియో ఆపరేటర్ అంబరీష్ నాగ్‌ను సంప్రదించారు. ఆయన తన నెట్‌వర్క్ ద్వారా సుశీల ఫోటోను షేర్ చేయగా, ఆమె జార్ఖండ్‌లోని తహుబకర్ గ్రామానికి చెందిన వ్యక్తి అని, అక్కడ ఆమె కుమారుడు మదన్ బెస్రా నివసిస్తున్నాడని తెలిసింది.
మతం పేరుతో వేరు చేసిన కొడుకు
వీడియో కాల్ ద్వారా కొడుకుతో మాట్లాడిన సుశీలకు నిరాశే ఎదురైంది. సుశీల భర్త హిందువు, కానీ సుశీల క్రైస్తవ మతానికి చెందినవారు. పెళ్లయిన తర్వాత కూడా ఆమె తన మతాన్ని మార్చుకోలేదు. దీనిపై ఆమె కుమారుడు మదన్ మాట్లాడుతూ.. “మా నాన్న, తాతలు హిందువులు. నా తల్లి హిందువుగా మారితేనే ఇంట్లో చోటు ఉంటుంది. ఆమె మతం మారడానికి నిరాకరిస్తే ఇంట్లో అనవసర సమస్యలు వస్తాయి. నేను హిందువుని, మా అమ్మ కచ్చితంగా మతం మారాల్సిందే” అని ఖరాఖండిగా చెప్పాడు.
తన్ను ఇంటికి తీసుకెళ్లాలంటే మతం మారాలని కొడుకు నిబంధన విధించినట్లు సుశీల కూడా ధృవీకరించారు. “నేను నా మతాన్ని వదులుకోను” అని ఆమె కన్నీటి పర్యంతమయ్యారు.
అధికారుల ప్రయత్నం:
ఈ విషయం తెలుసుకున్న స్థానిక పోలీస్ అధికారి మహావీర్ పండిట్ మాట్లాడుతూ.. “నేను స్వయంగా ఆ గ్రామానికి వెళ్లి కొడుకుతో మాట్లాడుతాను. కన్నతల్లిని అతను స్వీకరించేలా అవసరమైన కౌన్సెలింగ్ ఇచ్చి ఒప్పించడానికి ప్రయత్నిస్తాను” అని హామీ ఇచ్చారు.
25 ఏళ్ల తర్వాత తల్లి కొడుకులు కలుస్తారని ఆశించిన తరుణంలో, మతం పేరుతో కన్నతల్లిని దూరం పెట్టడం సామాజిక కార్యకర్తలను విస్తుపోయేలా చేస్తోంది.