కోయంబత్తూరు మహిళా కోర్టులో ఈ కేసు విచారణ వేగవంతంగా సాగుతోంది. ముఖ్యమంత్రి స్టాలిన్ ఆదేశాల మేరకు కేవలం నెల రోజుల్లోనే ఛార్జ్ షీట్ దాఖలు చేసి విచారణ ప్రారంభించారు.
ఘటన నేపథ్యం: మధురైకి చెందిన 21 ఏళ్ల యువతి కోయంబత్తూరులోని ఒక ప్రైవేట్ కాలేజీలో మొదటి సంవత్సరం చదువుతోంది. గత నవంబర్ 2వ తేదీ (ఆదివారం) రాత్రి ఆమె తన స్నేహితుడితో కలిసి కోయంబత్తూరు విమానాశ్రయం వెనుక భాగంలో మాట్లాడుకుంటూ ఉంది. ఆ సమయంలో అటుగా వచ్చిన ముగ్గురు యువకులు వారిని గమనించారు. ఆ ముగ్గురు మృగాళ్లు విద్యార్థిని స్నేహితుడిపై కత్తితో దాడి చేసి, యువతిని బలవంతంగా నిర్మానుష్య ప్రదేశానికి తీసుకెళ్లి కత్తితో బెదిరించి సామూహిక అత్యాచారానికి పాల్పడ్డారు.
నిందితుల అరెస్ట్: ఈ దాడిలో తీవ్రంగా గాయపడిన స్నేహితుడు స్పృహలోకి వచ్చిన తర్వాత పోలీసులకు సమాచారం అందించారు. వెంటనే రంగంలోకి దిగిన పోలీసులు అపస్మారక స్థితిలో పడి ఉన్న విద్యార్థినిని రక్షించి ఆసుపత్రికి తరలించారు. నిందితుల కోసం ప్రత్యేక బృందాలు గాలించి, తుడియలూర్ వెల్లకిణరు ప్రాంతంలో దాక్కున్న కరుప్పుసామి, కాళీశ్వరన్, తవసి అనే ముగ్గురిని ఎన్‌కౌంటర్ (కాల్పులు జరిపి) చేసి పట్టుకున్నారు.
కోర్టు విచారణ: ఈ కేసులో సుమారు 150 మంది సాక్షులను విచారించడం నిన్నటితో పూర్తయింది. ఈరోజు కరుప్పుసామి (A1), కాళీశ్వరన్ (A2), తవసి (A3)లను భారీ భద్రత నడుమ కోర్టుకు తీసుకువచ్చారు. మధ్యాహ్నం ప్రభుత్వ తరపు వాదనలు విపులంగా జరగనున్నాయి. ఇరుపక్షాల వాదనలు ముగిసిన తర్వాత న్యాయమూర్తి తీర్పు తేదీని త్వరలోనే ప్రకటించే అవకాశం ఉంది.