విజయ్ స్థాపించిన తమిళగ వెట్రి కళగం (TVK) రాజకీయాల్లోకి వచ్చాక, తమిళనాడు రాజకీయ రణం మునుపటి కంటే వేడెక్కింది. ముఖ్యంగా 2026 అసెంబ్లీ ఎన్నికల్లో కాంగ్రెస్ పార్టీ డీఎంకే కూటమి నుంచి బయటకు వచ్చి, విజయ్‌తో చేతులు కలిపే అవకాశం ఉందన్న వార్తలు డీఎంకే ప్రధాన కార్యాలయమైన ‘అరివాలయం’కు చేరుతున్నాయి.
ప్రస్తుతం డీఎంకే మరియు కాంగ్రెస్ మధ్య సంబంధాలు సన్నటి దారంపై వేలాడుతున్నాయి. “ఇకపై తగ్గేదే లే” అని ఢిల్లీ కాంగ్రెస్ అధిష్టానం గట్టి నిర్ణయంతో ఉన్నట్లు తెలుస్తోంది.
అధికార భాగస్వామ్యం: ఇరు పార్టీల మధ్య చిచ్చు!
వచ్చే రెండు నెలల్లో ఎన్నికలు రానున్న తరుణంలో కాంగ్రెస్ డిమాండ్ స్పష్టంగా ఉంది: ‘అధికారంలో భాగస్వామ్యం… మంత్రివర్గంలో చోటు’. గత ఎన్నికల్లాగా కేవలం బయటి నుండి మద్దతు ఇచ్చే విధానానికి స్వస్తి పలకాలని రాహుల్ గాంధీ సూచించినట్లు సమాచారం. అయితే, డీఎంకే అధినేత స్టాలిన్ మాత్రం “సొంత మెజారిటీతోనే అధికారం” అనే పట్టుదలతో ఉండటంతో కూటమిలో పొగలు మొదలయ్యాయి.
ఒకవేళ కాంగ్రెస్ విడిపోతే.. స్టాలిన్ ‘ప్లాన్-బి’ ఇదే!
1. సొంత మెజారిటీ – ‘ఉదయసూర్యుడి’ విశ్వరూపం! కాంగ్రెస్ బయటకు వెళ్తే డీఎంకేకు ఒక రకంగా తలనొప్పి తగ్గుతుందని పార్టీ శ్రేణులు భావిస్తున్నాయి. సాధారణంగా కాంగ్రెస్ కోసం డీఎంకే 30 నుండి 40 స్థానాలను కేటాయిస్తుంది. ఆ సీట్లు మిగిలితే, డీఎంకే నేరుగా 200 నియోజకవర్గాల్లో పోటీ చేయాలని ప్లాన్ చేస్తోంది. కూటమి పార్టీల దయాదాక్షిణ్యాలు లేకుండా 118 అనే మేజిక్ ఫిగర్‌ను దాటి, ఒంటరిగా అధికారం చేపట్టడానికి ఇదే సరైన మార్గమని డీఎంకే లెక్కలు వేస్తోంది.
2. వీసీకే మరియు డీఎండీకే: కొత్త పవర్ సెంటర్లు! కాంగ్రెస్ లేని లోటును భర్తీ చేయడానికి తిరుమావళవన్ (VCK) మరియు ప్రేమలత విజయకాంత్ (DMDK) పార్టీలకు డీఎంకే అదనపు ప్రాధాన్యత ఇస్తుంది.
- VCK బలం: దళిత మరియు మైనారిటీ ఓట్లు చీలకుండా ఉండటానికి వీసీకేను ‘సెకండ్ హీరో’గా ప్రొజెక్ట్ చేయాలని డీఎంకే భావిస్తోంది.
- DMDK కార్డు: విజయ్ రాకతో సినిమా గ్లామర్ పాలిటిక్స్ మళ్ళీ పెరగడంతో, ‘కెప్టెన్’ విజయకాంత ఓటు బ్యాంకును ఆకర్షించడానికి డీఎండీకేను ఒక ఆయుధంగా వాడుకోనుంది.
3. ‘ఢిల్లీ వర్సెస్ తమిళనాడు’ – సెంటిమెంట్ పాలిటిక్స్! కాంగ్రెస్‌తో కలిసి ఉంటే జాతీయ అంశాల్లో డీఎంకే కొన్ని చోట్ల సర్దుకుపోవాల్సి వస్తుంది. ఒకవేళ కాంగ్రెస్ విజయ్‌తో కలిస్తే.. “తమిళనాడును జాతీయ పార్టీలకు తాకట్టు పెడుతున్న నటుడి రాజకీయం” అని డీఎంకే ప్రచారాన్ని మళ్ళిస్తుంది. “మేము మట్టి బిడ్డలం.. వారు ఢిల్లీ చేతిలో కీలుబొమ్మలు” అనే ‘ద్రావిడ మోడల్’ సెంటిమెంట్‌తో ‘ఎమోషనల్ అటాక్’ చేయడానికి ప్లాన్ సిద్ధమైంది.
4. మైక్రో లెవల్ మేనేజ్మెంట్ కాంగ్రెస్‌కు పెద్ద ఓటు బ్యాంకు లేకపోయినా, కొన్ని జిల్లాల్లో వారి సాంప్రదాయ ఓట్లు కీలకం. వాటిని దక్కించుకోవడానికి, కాంగ్రెస్‌లోని అసంతృప్త నేతలను ఇప్పుడే డీఎంకేలోకి లాగేందుకు ఐటీ వింగ్ మరియు జిల్లా కార్యదర్శులు రంగంలోకి దిగారు.