వారణాసిలోని శంకరాచార్య స్వామి అవిముక్తేశ్వరానంద సరస్వతి చుట్టూ ఉచ్చు బిగుస్తోంది. ఇప్పటికే ఇద్దరు మైనర్ బాలురు తమపై జరిగిన అకృత్యాలను బయటపెట్టగా, ఇప్పుడు రచయిత్రి భూమికా ద్వివేది మఠం లోపల జరుగుతున్న వ్యవహారాలపై తీవ్ర ఆరోపణలు చేస్తున్నారు. 2022లో ఆమె వారణాసిలోని విద్యా మఠంలో రెండు నెలల పాటు గడిపారు. ఆ సమయంలో తాను చూసిన విషయాలను వివరిస్తూ ఆమె అందరినీ ఆశ్చర్యపరిచారు.
మఠం లోపల విలాసవంతమైన జీవితం
కాశీ మరియు ప్రయాగ్ గురించి పరిశోధన చేయడానికి వెళ్ళిన భూమికకు, అక్కడ ఆధ్యాత్మికత కంటే విలాసాలే ఎక్కువగా కనిపించాయని తెలిపారు.
- మఠం లోపల ఏసీలు, ఎల్‌ఈడీ టీవీలు, ఖరీదైన తివాచీలతో కూడిన లగ్జరీ వాతావరణం ఉంది.
- మఠం లోపల కొన్ని రహస్య గదులు ఉన్నాయని, వాటిపై కేవలం స్వామీజీ ‘సఖి’ (మహిళా స్నేహితురాలు) కి మాత్రమే నియంత్రణ ఉంటుందని ఆమె పేర్కొన్నారు.
- అక్కడి లిఫ్ట్ మార్గంలో వెళ్ళే గదులకు సాధారణ ప్రజల ప్రవేశాన్ని పూర్తిగా నిషేధించారని, ఆ ప్రాంతాన్ని ‘దీదీల ఏరియా’ అని పిలుస్తారని వెల్లడించారు.
‘సఖి’ సర్వాధికారిణి
మఠంలో ఒక మహిళ తనకు పరిచయమైందని, ఆమె తనను తాను స్వామీజీ ‘సఖి’గా చెప్పుకుందని భూమిక తెలిపారు. మఠంలోని సెక్యూరిటీ కెమెరాల యాక్సెస్ కూడా ఆమె వద్దే ఉంటుందని, అక్కడ ఆమె ఒక రాణిలా చలామణి అవుతుందని ఆరోపించారు. మఠం ప్రాంగణంలో స్విమ్మింగ్ పూల్ కూడా ఉందని, కానీ అక్కడ ఉండే చిన్న పిల్లలను (బటుకులను) స్నానం చేయడానికి అనుమతించరని తెలిపారు.
రచయిత్రి చేసిన మరికొన్ని ఆరోపణలు:
- బటుకులపై వేధింపులు: పేద కుటుంబాల నుండి వచ్చే చిన్న పిల్లలతో మఠంలో చాకిరీ చేయిస్తారు.
- ఫోటోలపై నిషేధం: ఒక 8 ఏళ్ల బాలుడు తనతో ఫోటో దిగడానికి నిరాకరిస్తూ, బయటి వ్యక్తులతో ఫోటోలు దిగవద్దని ‘స్వామీ శ్రీ’ ఆజ్ఞాపించారని చెప్పాడని ఆమె గుర్తు చేసుకున్నారు.
- మ్యానేజర్ వ్యాఖ్యలు: మఠం మ్యానేజర్ మిశ్రా తనతో మాట్లాడుతూ.. “ప్రతి పురుషుడికి కొన్ని అవసరాలు ఉంటాయి, ఆయన విశ్రాంతి కోసం ఇక్కడికి వస్తారు” అని చెప్పాడని భూమిక సంచలన ఆరోపణ చేశారు. మ్యానేజర్ కూడా ఆ మహిళను స్వామీజీ ‘సఖి’గానే పరిచయం చేశారని తెలిపారు.
స్వరూపానంద కాలానికి, ఇప్పటికీ తేడా ఇదే..
గతంలో స్వామి స్వరూపానంద సరస్వతి గదిలోకి ఎవరైనా వెళ్లవచ్చని, అక్కడ కేవలం పుస్తకాలు, గ్రంథాలు ఉండేవని.. కానీ అవిముక్తేశ్వరానంద సమయంలో అంతా రహస్యమయంగా మారిందని భూమిక పేర్కొన్నారు. స్వరూపానంద అనారోగ్యంతో ఉన్నప్పుడు ఆయన శిష్యులను కూడా అవిముక్తేశ్వరానంద కలవనివ్వలేదని ఆమె ఆరోపించారు. తాను కళ్లారా చూసిన నిజాలనే చెబుతున్నానని, తన వద్ద ఫోటోలు కూడా ఉన్నాయని ఆమె స్పష్టం చేశారు.