రాష్ట్ర మాజీ ఉప ముఖ్యమంత్రి అజిత్ పవార్ మరణం తర్వాత మహారాష్ట్ర రాజకీయాల్లో పెను మార్పులు చోటుచేసుకున్నాయి. ఎన్సీపీ అధ్యక్ష పదవిని ఎవరు చేపడతారనే చర్చ జరుగుతుండగానే, మరోవైపు పార్టీ అంతర్గత వ్యూహాలపై పెద్ద ఎత్తున చర్చ నడుస్తోంది.
అజిత్ పవార్ భార్య సునేత్రా పవార్ జాతీయ వర్కింగ్ ప్రెసిడెంట్‌గా ఎన్నికైన తర్వాత ఏర్పాటు చేసిన విలేకరుల సమావేశంలో ఒక వింత ఘటన చోటుచేసుకుంది. ప్రెస్ కాన్ఫరెన్స్ అధికారికంగా ప్రారంభం కావడానికి ముందే ప్రఫుల్ పటేల్, సునీల్ తట్కరే మరియు ఎమ్మెల్యే సరోజ్ అహిరే మధ్య జరిగిన సంభాషణ మైక్‌లో రికార్డ్ అయ్యింది. ప్రస్తుతం ఈ వీడియో సోషల్ మీడియాలో దావానలంలా వైరల్ అవుతోంది.
వదినను విలేకరుల ప్రశ్నల నుండి ఎలా కాపాడాలి?
ఈ విలేకరుల సమావేశం ప్రారంభం కావడానికి ముందు, మైక్ ఆన్‌లో ఉందనే విషయం తెలియక కొందరు నేతలు, ఎమ్మెల్యేలు తమలో తాము గుసగుసలాడుకోవడం కనిపించింది. ముఖ్యంగా సునేత్రా పవార్‌ను విలేకరుల ప్రశ్నల నుండి ఎలా తప్పించాలో వారు చర్చించుకున్నారు.
“వదిన మానసిక స్థితి బాలేదని చెబుదాం” ఈ క్రమంలో ఎమ్మెల్యే సరోజ్ అహిరే కార్యకర్తలను దూరం పెట్టడంపై వ్యాఖ్యానిస్తూ.. “దాదా (అజిత్ పవార్) దగ్గరకు వెళ్లే అవకాశం ఎప్పుడూ రాలేదు, కనీసం వదిన దగ్గరికైనా వెళ్లనివ్వండి” అని తన ఆవేదన వ్యక్తం చేశారు. ఆ తర్వాత కొందరు సీనియర్ నేతలు సునేత్రా పవార్‌ను అప్రమత్తం చేస్తూ సలహాలు ఇచ్చారు. “మీరు ఎలాంటి ప్రశ్నలు తీసుకోవద్దు, మీ మాట పూర్తికాగానే వెంటనే లేచి వెళ్ళిపోండి. విలేకరులు ఒత్తిడి చేస్తే మేము మిమ్మల్ని అక్కడి నుండి పంపిస్తాము” అని మార్గనిర్దేశం చేశారు. అంతేకాకుండా, “వదినగారి మనస్థితి సరిగా లేదు” అని చెప్పి సమయాన్ని దాటవేద్దామని ప్లాన్ చేసుకున్నారు.
నేతలు సునేత్రా పవార్‌కు స్పష్టమైన సూచనలు ఇస్తూ.. “మీరు కేవలం మీ స్టేట్‌మెంట్ ఇచ్చి వెళ్ళిపోండి, మిగతాది మేము చూసుకుంటాం. విలేకరులు ప్రశ్నలు అడగటం మొదలుపెట్టినప్పుడు మీరు లేవండి, మేము పక్కనే ఉంటాం” అని చెప్పారు.
ప్లాన్ ప్రకారం అంతా ముగిసింది
విశేషమేమిటంటే, ప్రెస్ కాన్ఫరెన్స్ ప్రారంభం కాగానే నేతలు తమ ప్లాన్‌ను తూచా తప్పకుండా అమలు చేశారు. సునేత్రా పవార్ విలేకరుల ముందుకు వచ్చి కూర్చున్నారు కానీ, ఆమె ఎలాంటి ప్రకటన చేయలేదు. కొద్ది నిమిషాల తర్వాత ప్రఫుల్ పటేల్ ఆమెను వెళ్ళిపోమని సైగ చేశారు. దీంతో సునేత్రా పవార్ అక్కడి నుండి నిష్క్రమించారు. ఆ తర్వాత సునీల్ తట్కరే, ప్రఫుల్ పటేల్ విలేకరుల ప్రశ్నలకు సమాధానమిచ్చారు. ఈ ఘటనతో, అసలు ఈ విలేకరుల సమావేశం కేవలం పేరు కోసమేనా? అనే ప్రశ్నలు తలెత్తుతున్నాయి.
మైక్ ఆన్‌లో ఉండటంతో నేతలు వేసిన ‘సీక్రెట్’ ప్లాన్ బయటపడటం ఇప్పుడు చర్చనీయాంశంగా మారింది.