ఇరాన్‌లోని వివిధ ప్రాంతాలపై అమెరికా మరియు ఇజ్రాయెల్ సంయుక్తంగా క్షిపణి దాడులు చేయడంతో పశ్చిమ ఆసియాలో తీవ్ర ఆందోళన నెలకొంది. ఇరాన్ ప్రతీకార దాడులు ప్రారంభించడంతో లోకం మరో మహా యుద్ధ భయంలో మునిగిపోయింది. ప్రపంచంలోనే అత్యంత శక్తివంతమైన సైనిక బలగాలు తలపడుతున్న ఈ తరుణంలో, దివంగత బల్గేరియన్ జ్యోతిష్కురాలు బాబా వంగా చేసిన ప్రవచనాలు సోషల్ మీడియాలో వైరల్ అవుతున్నాయి. 2026లో మూడవ ప్రపంచ యుద్ధం వస్తుందని ఆమె అప్పట్లోనే ఊహించారని, ప్రస్తుత దాడులే దానికి ఆరంభమని చాలా మంది అభిప్రాయపడుతున్నారు.
1996లో మరణించిన బాబా వంగా, 2026 ప్రారంభంలో ప్రపంచాన్ని కుదిపేసే ఒక ‘మహాయుద్ధం’ (Great War) తూర్పు దేశాల నుండి మొదలవుతుందని చెప్పినట్లు ఆమె అనుయాయులు వాదిస్తున్నారు. ఈ యుద్ధం వల్ల యూరప్ ఖండం తీవ్రంగా నష్టపోతుందని, అక్కడి భూమి నిస్సారంగా మారుతుందని ఆమె అప్పట్లో హెచ్చరించారట. ఈ ఘర్షణల అనంతరం రష్యా ప్రపంచంలోనే అగ్రగామి శక్తిగా అవతరిస్తుందని ఆ ప్రవచనాల్లో ఉంది.
ఎవరీ బాబా వంగా? బాబా వంగా అసలు పేరు వంగేలియా పాండెవా గుష్టెరోవా. 1911లో జన్మించిన ఆమె, 12 ఏళ్ల వయసులో ఒక తుపాను కారణంగా చూపు కోల్పోయారు. ఆ తర్వాతే ఆమెకు భవిష్యత్తును చూసే అద్భుత శక్తి లభించిందని నమ్ముతారు. రెండో ప్రపంచ యుద్ధం తర్వాత ఆమె ప్రవచనాల వల్ల ప్రపంచవ్యాప్తంగా ప్రసిద్ధి చెందారు. బల్గేరియా రాజు కూడా ఆమెను సందర్శించారని చెబుతారు.
ప్రపంచ దేశాల ఆందోళన ఇరాన్‌లోని అణు ముప్పును తొలగించేందుకే టెహ్రాన్‌లోని కీలక ప్రాంతాలపై దాడులు చేస్తున్నట్లు ఇజ్రాయెల్ ప్రధాని నెతన్యాహు మరియు అమెరికా అధ్యక్షుడు డోనాల్డ్ ట్రంప్ స్పష్టం చేశారు. ఇరాన్ సుప్రీం లీడర్ అయతొల్లా అలీ ఖమేనీ కార్యాలయం సమీపంలో దాడులు జరగడంతో ఆయనను సురక్షిత ప్రాంతానికి తరలించారు. ప్రస్తుతం ఇరు దేశాలు తమ గగనతలాన్ని మూసివేసాయి.
మరోవైపు, అమెరికా-ఇజ్రాయెల్ దాడులకు ప్రతిగా ఇరాన్ ‘ఆపరేషన్ ట్రూ ప్రామిస్ 4’ (Operation True Promise 4) ప్రారంభించింది. అమెరికా నౌకాదళం మరియు సైనిక స్థావరాలపై ఇరాన్ దాడులు చేసింది. దీనిలో భాగంగా రియాద్, దుబాయ్, అబుదాబిలలో పేలుళ్లు జరిగినట్లు నివేదికలు చెబుతున్నాయి. ఈ పరిణామాలు బాబా వంగా చెప్పినట్లు ప్రపంచ విపత్తుకు దారితీస్తాయా అని లోకం భయపడుతోంది.