దుబాయ్: ఇరాన్-ఇజ్రాయెల్-అమెరికా మధ్య ఉద్రిక్తతలు అత్యంత ప్రమాదకరమైన స్థాయికి చేరుకున్నాయి. ఇరాన్ జరిపిన ఎదురుదాడులు పొరుగు దేశాలకు కూడా వ్యాపించాయి. యూఏఈ, బహ్రెయిన్, కువైట్, ఖతార్ వంటి దేశాల్లోని వివిధ ప్రాంతాలను లక్ష్యంగా చేసుకుని క్షిపణులు, డ్రోన్లు ప్రయోగించినట్లు సమాచారం. దుబాయ్, అబుదాబి వంటి నగరాల్లో క్షిపణులను అడ్డుకుంటున్న శబ్దాలు వినిపించాయని, విమానాశ్రయాల కార్యకలాపాలకు తాత్కాలికంగా అంతరాయం కలిగిందని నివేదికలు చెబుతున్నాయి. ఈ నేపథ్యంలో గల్ఫ్ దేశాల్లోని ప్రవాసులు అత్యంత అప్రమత్తంగా ఉండాలి.
జాగ్రత్త వహించండి:
- వీడియోలు/ఫోటోలు షేర్ చేయవద్దు: ఇరాన్ జరిపిన క్షిపణి లేదా డ్రోన్ దాడులకు సంబంధించిన దృశ్యాలను సోషల్ మీడియాలో ఎట్టి పరిస్థితుల్లోనూ పంచుకోకండి. మీరు చూసిన దృశ్యాలను ఇతరులకు పంపడం లేదా స్టేటస్‌గా పెట్టడం గల్ఫ్ దేశాల్లో తీవ్రమైన నేరంగా పరిగణించబడుతుంది.
- అధికారిక వార్తలనే నమ్మండి: సోషల్ మీడియాలో వచ్చే ‘బ్రేకింగ్ న్యూస్’లను గుడ్డిగా నమ్మకండి. వాట్సాప్ గ్రూపుల్లో తప్పుడు సమాచారాన్ని లేదా భయాందోళన కలిగించే వాయిస్ మెసేజ్‌లను పంపడం చట్టవిరుద్ధం.
- చట్టాలు కఠినం: యూఏఈ సైబర్ చట్టం (Federal Decree Law No. 34 of 2021) ప్రకారం, దేశ భద్రతకు విఘాతం కలిగించే సమాచారాన్ని ప్రచారం చేస్తే లక్షల దిర్హామ్‌ల జరిమానాతో పాటు జైలు శిక్ష కూడా పడవచ్చు. సౌదీ అరేబియా, ఖతార్‌లలో కూడా ఇటువంటి కఠిన నిబంధనలు ఉన్నాయి. మీరు షేర్ చేసే ఒక్క ఫోటో మీ వీసా రద్దుకు లేదా దేశం నుండి బహిష్కరణకు (Deportation) దారి తీయవచ్చు.