ఇంటర్నేషనల్ ఫ్లైట్‌కు సంబంధించిన ఒక వీడియో ప్రస్తుతం ఇంటర్నెట్‌లో తెగ వైరల్ అవుతోంది. అందులో ఒక యువకుడు, యువతి ప్రవర్తించిన తీరు చూసి తోటి ప్రయాణికులు ముక్కున వేలేసుకున్నారు. జంతువుల్లా వారు కొట్టుకున్న తీరు చూసి అందరూ షాక్‌కు గురయ్యారు.
కూరగాయల మార్కెట్‌లా మారిన విమానం
సాధారణంగా విమాన ప్రయాణికులు చాలా పద్ధతిగా ఉంటారని, బస్సు లేదా రైలు ప్రయాణికుల్లా గొడవపడరని ఒక నమ్మకం ఉంటుంది. కానీ ఈ వీడియో ఆ అంచనాలను తలకిందులు చేసింది. వీరిద్దరూ ఒక కూరగాయల మార్కెట్‌లో ఉన్నట్లుగా విపరీతంగా అరుచుకుంటూ కనిపించారు.
చికెన్ ముక్కతో మొదలైన రచ్చ
అసలు గొడవ ఎక్కడ మొదలైందంటే.. విమానంలో ప్రయాణిస్తున్న సమయంలో ఒక యువకుడు చికెన్ తింటున్నాడు. ఆ సమయంలో ఒక చికెన్ ముక్క పక్కనే కూర్చున్న యువతిపై పడిందని సమాచారం. అంతే, అక్కడితో హై-వోల్టేజ్ డ్రామా మొదలైంది.
బూతులతో విరుచుకుపడ్డ ప్రయాణికులు
ఒకరిపై ఒకరు అరుచుకుంటూ, బూతులు తిట్టుకుంటూ రచ్చ చేశారు. క్రూ మెంబర్స్ సకాలంలో స్పందించి వారిని వారించకపోతే, పరిస్థితి చేయి దాటి ఒకరిపై ఒకరు దాడి చేసుకునే వరకు వెళ్లేది. వీరి ప్రవర్తన భరించలేక కొందరు ప్రయాణికులు తల పట్టుకోగా, మరికొందరు హెడ్‌ఫోన్స్ పెట్టుకుని ఆ గోల వినకుండా ప్రయత్నించారు.
నెటిజన్ల రియాక్షన్
ఈ వీడియో చూసిన నెటిజన్లు రకరకాలుగా స్పందిస్తున్నారు. “ఇప్పటివరకు ఇలాంటివి మెట్రో ట్రైన్లలోనే చూశాం, ఇప్పుడు ఫ్లైట్లలో కూడా మొదలయ్యాయా?” అని ఒకరు కామెంట్ చేయగా.. “అసలు ఇలాంటి వాళ్లు ఎక్కడి నుండి వస్తారు? ఫ్లైట్‌లో కూడా ప్రశాంతత లేకుండా చేస్తున్నారు” అని మరొకరు మండిపడ్డారు.