ఇరాన్ నుండి పలాయనం: అమెరికా మరియు ఇజ్రాయెల్ జరుపుతున్న దాడుల ధాటికి భయపడి ఇరాన్ ప్రజలు తమ ప్రాణాలను అరచేతిలో పెట్టుకుని పొరుగు దేశమైన టర్కీకి పరుగులు తీస్తున్నారు. అయితే, సరిహద్దు వద్ద టర్కీ వారిని రెండు రోజుల పాటు అనుమతించకపోవడంతో శరణార్థులు తీవ్ర ఇబ్బందులు పడ్డారు.
యుద్ధ తీవ్రత: ఇరాన్ అత్యున్నత నాయకుడు అయతొల్లా అలీ ఖమేనీ మరణించినట్లు వార్తలు వస్తున్నాయి. యుద్ధం రోజురోజుకూ ముదురుతోంది. ఇరాన్ కూడా ప్రతీకార దాడులు ప్రారంభించింది. కేవలం ఇజ్రాయెల్నే కాకుండా, ట్రంప్పై పగ తీర్చుకునే క్రమంలో అమెరికా సైనిక స్థావరాలు ఉన్న సౌదీ అరేబియా, బహ్రెయిన్, యూఏఈ, ఖతార్ మరియు ఒమన్ వంటి దేశాలపై ఇరాన్ క్షిపణులు, డ్రోన్లతో విరుచుకుపడుతోంది.
ట్రంప్ హెచ్చరిక – ప్రజల ఆందోళన: ఈ యుద్ధం మరో 4 నుండి 5 వారాల పాటు కొనసాగే అవకాశం ఉందని అమెరికా అధ్యక్షుడు డొనాల్డ్ ట్రంప్ ప్రకటించారు. దీంతో ఇరాన్ ప్రజల భద్రత ప్రశ్నార్థకమైంది. మార్చి 1వ తేదీ నుండి వేలాది మంది ప్రజలు టర్కీ సరిహద్దుల వైపు వెళ్లారు. తొలుత టర్కీ వారిని అడ్డుకున్నప్పటికీ, నిన్న మధ్యాహ్నం నుండి ‘కపికోయ్’ సరిహద్దు ద్వారా శరణార్థులను దేశంలోకి అనుమతించడం ప్రారంభించింది.
క్షేత్రస్థాయి పరిస్థితి: టెహ్రాన్ వాసుల కథనం ప్రకారం.. నగరంలో బాంబు పేలుళ్లు జరుగుతున్నాయి. ప్రస్తుతానికి సామాన్యులపై నేరుగా దాడులు జరగకపోయినా, ఎప్పుడు ఏం జరుగుతుందో అన్న భయంతో ప్రజలు నిత్యావసర వస్తువుల కోసం ఎగబడుతున్నారు. పెట్రోల్, డీజిల్ కోసం బారులు తీరుతున్నారు. భవిష్యత్తులో ఆహార కొరత ఏర్పడవచ్చనే భయంతో చాలామంది దేశం విడిచి వెళ్తున్నారు.
Leave a Reply