ఈయనే ఈ కాలపు ప్రహ్లాదుడా..? 30 అడుగుల ఎత్తున ఎగసిపడుతున్న అగ్ని కీలలు – 20 అడుగుల దూరం.. అల్వోకగా దాటి వచ్చిన వ్యక్తి..!!

మధురలోని ఫాలెన్ (Phalen) గ్రామంలో ఈ ఏడాది హోలీ పండుగ సందర్భంగా సైన్స్‌కు కూడా అందని ఒక అద్భుతం జరిగింది.

సుమారు 5,200 ఏళ్ల క్రితం భక్త ప్రహ్లాదుడిని దహనం చేయడానికి ప్రయత్నించిన అదే స్థలంలో, నేటికీ ఆ సంప్రదాయం సజీవంగా కొనసాగుతోంది. ఈసారి సంజు పాండా అనే వ్యక్తి, నిప్పులు చెరుగుతున్న 30 అడుగుల ఎత్తు గల హోలికా దహన మంటల మధ్య నుండి ఎటువంటి గాయాలు లేకుండా సాధారణంగా నడిచి వచ్చి, అక్కడ ఉన్న వేలాది మంది భక్తులను ఆశ్చర్యపరిచారు.

సుమారు 20 అడుగుల పొడవున్న ఆ మండుతున్న నిప్పుల దారిని ఆయన దాటుతున్నప్పుడు, ‘జై శ్రీకృష్ణ’ అనే నినాదాలు మిన్నంటాయి. ఈ సాహసం కేవలం ఒక్క నిమిషంలో చేసిన ధైర్యం మాత్రమే కాదని, ఇది 45 రోజుల కఠిన తపస్సు ఫలితమని సంజు పాండా చెబుతున్నారు. వసంత పంచమి నుండే అన్నపానీయాలు మాని, కుటుంబ వ్యామోహాన్ని వీడి, కేవలం పండ్లను మాత్రమే ఆహారంగా తీసుకుంటూ ఆయన ఈ దీక్షను చేపట్టారు.

భక్తితో అగ్నిని జయించిన క్షణం
హోలికా దహనానికి ముందు పవిత్ర స్నానం ఆచరించి దైవ ప్రార్థన చేసిన ఆయన, ఆ రగులుతున్న మంటల మధ్యకు వెళ్ళినప్పుడు తనకు ఒక దైవిక మార్గదర్శకత్వం లభించిందని భక్తితో తెలిపారు. అంత పెద్ద అగ్ని వలయంలోకి వెళ్ళినప్పటికీ, ఆయనకు కనీసం చిన్న గాయం కూడా కాకపోవడం ఆ ప్రాంత ప్రజలలో భక్తిని మరింత పెంపొందించింది.