బీహార్‌లోని భోజ్‌పూర్ జిల్లాలో ఒక ఆసక్తికరమైన పెళ్లి కథ వెలుగులోకి వచ్చింది. జయమాల కార్యక్రమానికి కొద్ది నిమిషాల ముందే వధువు.. “నాన్న, నేను ఈ పెళ్లి చేసుకోను. ఈ అబ్బాయి నాకు అంకుల్ టైపులో కనిపిస్తున్నాడు” అని తేల్చి చెప్పడంతో ఆ పెళ్లి అక్కడితోనే ఆగిపోయింది.
అసలేం జరిగింది? సందేశ్ పోలీస్ స్టేషన్ పరిధిలోని దలేల్‌గంజ్ గ్రామానికి చెందిన 22 ఏళ్ల శోభా కుమారికి, కోసడిహరా గ్రామానికి చెందిన 36 ఏళ్ల సుధీర్ కుమార్‌తో మార్చి 3న పెళ్లి నిశ్చయమైంది. రెండు కుటుంబాల అంగీకారంతో కుదిరిన ఈ పెళ్లి వేడుక ఆరాలోని ఒక వెడ్డింగ్ పాయింట్‌లో ఏర్పాటు చేశారు.
పగలు పసుపు (హల్దీ), తిలకం వంటి ఆచారాలన్నీ పూర్తయ్యాయి. బరాత్ కూడా చేరుకుంది, పెళ్లికొడుకు సుధీర్ స్టేజీపై జయమాల కోసం సిద్ధంగా ఉన్నాడు. అతిథుల కోసం విందు భోజనాలు సిద్ధమయ్యాయి. అయితే, అకస్మాత్తుగా వధువు తన కుటుంబంతో కలిసి అక్కడి నుంచి వెళ్ళిపోయిందనే వార్త కలకలం రేపింది. బరాత్ బృందం ఎంత ఎదురుచూసినా వధువు స్టేజీపైకి రాలేదు.
వధువు నిరాకరణకు కారణం: తర్వాత తెలిసిన విషయం ఏమిటంటే, వధువు తన తండ్రితో గట్టిగా ఇలా చెప్పింది: “నాన్న, నేను ఈ పెళ్లి చేసుకోను. ప్రాణమైనా తీసుకుంటాను కానీ ఇతనితో పెళ్లి నాకు ఇష్టం లేదు. అతన్ని చూడండి, అంకుల్ లా కనిపిస్తున్నాడు. సమాజంలో జనం ఏమనుకుంటారు? నా స్నేహితులకు నేను ఏం సమాధానం చెప్పాలి?”
కూతురి పంతం చూసిన తండ్రి, మౌనంగా కుటుంబ సభ్యులందరినీ తీసుకుని అక్కడి నుండి వెళ్లిపోయాడు. అర్థరాత్రి వరకు ఎదురుచూసిన వరుడు సుధీర్, చివరకు పెళ్లికూతురు లేకుండానే తన ఇంటికి తిరిగి వెళ్ళిపోయాడు.
వరుడి కుటుంబం స్పందన: వరుడి తండ్రి శివాజీ సింగ్ మాట్లాడుతూ.. ఇరు కుటుంబాల అంగీకారంతోనే సంబంధం కుదిరిందని, అమ్మాయి ఇదివరకే అబ్బాయిని చూసిందని తెలిపారు. వరుడు సుధీర్ కూడా అమ్మాయితో తాను ఫోన్లో తరచుగా మాట్లాడేవాడినని, ఆమె పెళ్లికి అంగీకారం తెలిపిందని వాపోయాడు. కానీ చివరి నిమిషంలో ఆమె తీసుకున్న ఈ నిర్ణయం పెళ్లిని అర్ధాంతరంగా నిలిపివేసింది.