బీజింగ్: చైనాలోని మధ్య ప్రాంతంలో ఒక ఆశ్చర్యకరమైన ఘటన వెలుగులోకి వచ్చింది. ఒక వ్యక్తి బాతును కోస్తుండగా దాని పొట్టలో బంగారు రేణువులు కనిపించాయి. ‘సౌత్ చైనా మార్నింగ్ పోస్ట్’ కథనం ప్రకారం, ఫిబ్రవరిలో హునాన్ ప్రాంతంలోని లాంగ్‌హుయ్ కౌంటీలో నివసించే ‘లియు’ అనే వ్యక్తికి తన బాతు పొట్టలో ఈ బంగారం దొరికింది.
1.62 లక్షల విలువైన బంగారం: ఈ రేణువులకు ‘బర్నింగ్ టెస్ట్’ నిర్వహించగా, అది నిజమైన బంగారమేనని ప్రాథమికంగా నిర్ధారణ అయింది. దీని బరువు సుమారు 10 గ్రాములు ఉంటుందని అంచనా. దీని విలువ దాదాపు 12,000 యువాన్లు, అంటే భారతీయ కరెన్సీలో సుమారు 1.62 లక్షల రూపాయలు ఉంటుందని అధికారులు తెలిపారు.
బంగారం ఎలా వచ్చింది? లియు తండ్రి కథనం ప్రకారం, ఈ బాతులు నది సమీపంలోని ఖాళీ ప్రదేశాల్లో పెరుగుతుంటాయి. ఈ ప్రాంతం గతంలో బంగారు గనులకు ప్రసిద్ధి చెందింది. బాతులు ఆహారం కోసం మట్టిని వెతికే క్రమంలో బంగారు రేణువులతో కూడిన మట్టిని మింగి ఉండవచ్చని భావిస్తున్నారు. సాధారణంగా బంగారం జీర్ణం కాదు కాబట్టి, అది బాతు జీర్ణవ్యవస్థలో అలానే ఉండిపోయింది.
గ్రామంలో గతంలోనూ ఇలాంటి ఘటనలు: గతంలో కూడా కొందరు గ్రామస్తులకు బాతుల పొట్టలో బంగారం దొరికినప్పటికీ, ఈ స్థాయిలో దొరకడం ఇదే మొదటిసారి అని లియు చెప్పాడు. గతేడాది కూడా ఇదే ప్రాంతంలోని నదిలో ఇసుకను కడిగేటప్పుడు 10 గ్రాముల కంటే ఎక్కువ బంగారం దొరికినట్లు అధికారులు తెలిపారు.
బంగారానికి యజమాని ఎవరు? 1970 నుండి 1990 మధ్య కాలంలో ఈ ప్రాంతంలో ‘గోల్డ్ రష్’ (బంగారం కోసం వేట) సాగేది. ఆ తర్వాత ప్రభుత్వం ప్రైవేట్ మైనింగ్‌పై నిషేధం విధించింది. ఇప్పుడు బాతు పొట్టలో దొరికిన ఈ బంగారానికి యజమాని ఎవరో నిర్ణయించడం కష్టమని అధికారులు అంటున్నారు.