న్యూక్లియర్ వార్ సినారియో: ప్రపంచవ్యాప్త ఉద్రిక్తతల మధ్య అణుయుద్ధ నిపుణులు మరియు ‘నేచర్’ (Nature) పత్రికలో ప్రచురితమైన ఒక కొత్త అధ్యయనం ప్రపంచాన్ని హెచ్చరించింది. ప్రస్తుతానికి అందుబాటులో ఉన్న 12,000 అణు క్షిపణులను గనుక ప్రయోగిస్తే, భూమిపై జీవరాశి ఉనికి పూర్తిగా తుడిచిపెట్టుకుపోయే ప్రమాదం ఉంది.
శాస్త్రవేత్తల అభిప్రాయం ప్రకారం, అసలైన ముప్పు అణు పేలుళ్ల కంటే, ఆ తర్వాత వచ్చే ‘న్యూక్లియర్ వింటర్’ (అణు శీతాకాలం) వల్లనే ఎక్కువగా ఉంటుంది.
ఏమిటి ఈ న్యూక్లియర్ వింటర్?
అణు పేలుళ్లు కేవలం అగ్నిగోళాలు మాత్రమే కావు, అవి ప్రకృతి చక్రం మొత్తాన్ని నాశనం చేస్తాయి. శాస్త్రవేత్తలు దీనిని నాలుగు ప్రధాన దశలుగా వివరించారు:
నల్లని పొర: పేలుళ్ల వల్ల వెలువడే 150 మిలియన్ టన్నుల మసి మరియు పొగ ఆకాశంలో ఒక దట్టమైన పొరలా ఏర్పడుతుంది.
అంధకారం: ఈ పొర సూర్యరశ్మిని భూమికి చేరకుండా అడ్డుకుంటుంది, దీనివల్ల ప్రపంచమంతా చీకటి అలుముకుంటుంది.
గడ్డకట్టే చలి: ఎండ లేకపోవడంతో భూమి ఉష్ణోగ్రత -20°C నుండి -30°C వరకు పడిపోతుంది. అమెరికా, ఉక్రెయిన్ వంటి సారవంతమైన ప్రాంతాలు 10 ఏళ్ల పాటు మంచు ఎడారులలా మారిపోతాయి.
ఓజోన్ పొర విధ్వంసం: పేలుళ్ల వల్ల వెలువడే వాయువులు ఓజోన్ పొరను దెబ్బతీస్తాయి. సంవత్సరాల తర్వాత పొగ తొలగినా, సూర్యుని అతిినీలలోహిత (UV) కిరణాలు నేరుగా చర్మాన్ని దహించివేస్తాయి, దీనివల్ల క్యాన్సర్ మరియు అంధత్వం వ్యాపిస్తాయి. ఆహారం పండక ప్రపంచవ్యాప్తంగా దాదాపు 500 కోట్ల మంది ఆకలితో మరణించే అవకాశం ఉంది.
కేవలం ఈ 2 దేశాలే ఎందుకు బతుకుతాయి?
నిపుణుల విశ్లేషణ ప్రకారం, ఇంతటి భీభత్సంలోనూ ఆస్ట్రేలియా మరియు న్యూజిలాండ్ దేశాలకు బతికే అవకాశాలు ఎక్కువగా ఉన్నాయి.
సముద్ర ప్రభావం: ఈ రెండు దేశాల చుట్టూ ఉన్న సముద్రం వల్ల ఉష్ణోగ్రతలు వ్యవసాయం అసాధ్యం అయ్యేంతగా పడిపోవు.
భౌగోళిక దూరం: ప్రధాన యుద్ధ క్షేత్రాలైన (అమెరికా, యూరప్, ఆసియా) నుండి ఇవి దూరంగా ఉండటం వల్ల ప్రారంభ రేడియేషన్ మరియు పేలుళ్ల నుండి కొంతవరకు రక్షణ లభిస్తుంది. అయితే, ఇక్కడ కూడా జీవితం సులభం కాదు; ప్రజలు భూగర్భంలో తలదాచుకోవాల్సి ఉంటుంది.
100 మిలియన్ డిగ్రీల ఉష్ణోగ్రత
ప్రముఖ రచయిత్రి అన్నీ జాకబ్సన్ ప్రకారం, అణు పేలుడు సమయంలో ఉష్ణోగ్రత 100 మిలియన్ డిగ్రీల సెల్సియస్‌కు చేరుకుంటుంది. ఇది సూర్యుని కేంద్రం కంటే కూడా వేడిగా ఉంటుంది, ఇది క్షణాల్లో కోట్ల మందిని ఆవిరి చేస్తుంది.
ప్రపంచంలో ముప్పు ఎక్కడెక్కడ ఉంది?
మధ్య ప్రాచ్యం: ఇజ్రాయెల్, అమెరికా మరియు ఇరాన్ మధ్య ఘర్షణలు మూడవ ప్రపంచ యుద్ధానికి దారితీసేలా ఉన్నాయి.
యూరప్: రష్యా-ఉక్రెయిన్ మధ్య గత 4 ఏళ్లుగా సాగుతున్న యుద్ధం ముగిసేలా కనిపించడం లేదు.
దక్షిణాసియా: అణ్వాయుధాలు కలిగిన పాకిస్థాన్‌పై తాలిబన్ల దాడులు మరియు చైనా-తైవాన్ ఉద్రిక్తతలు ప్రపంచాన్ని అస్థిరపరుస్తున్నాయి.