ఆరోగ్యకరమైన జీవనం కోసం కేవలం తిండిపై దృష్టి పెడితే సరిపోదు. మనం నిత్యం వాడే వస్తువులు కూడా మన ఆరోగ్యంపై ప్రభావం చూపుతాయి. ముఖ్యంగా ఇంట్లో వాడే వస్తువులు ‘టాక్సిక్’ (విషపూరితం) అయితే, మనం ఎంత జాగ్రత్తగా ఉన్నా అనారోగ్యం పాలయ్యే అవకాశం ఉంది.
డాక్టర్ కోమల్ కులకర్ణి తన ఇంట్లోకి అడుగుపెట్టనివ్వని ఆ 6 వస్తువుల జాబితా ఇక్కడ ఉంది:
- అగరుబత్తులు (Incense Sticks)
చాలా మంది ఇళ్లలో ప్రతిరోజూ అగరుబత్తులు వెలిగించడం అలవాటు. కానీ వీటి నుంచి వచ్చే సువాసన వెనుక ప్రమాదకరమైన పొగ ఉంటుంది. ఈ పొగ శ్వాసకోశ ఇబ్బందులను కలిగిస్తుంది, అలర్జీలను పెంచుతుంది మరియు అస్తమా (Asthma) ఉన్నవారికి ఇది చాలా ప్రమాదకరం. అందుకే డాక్టర్ వీటిని తన ఇంట్లో పూర్తిగా నిలిపివేశారు. - ఓపెన్ డస్ట్ బిన్స్ (Open Dustbins)
మూత లేని డస్ట్ బిన్స్ వాడటం వల్ల బ్యాక్టీరియా మరియు దుర్వాసన ఇల్లంతా వ్యాపిస్తాయి. ఇది క్రిమి కీటకాలను ఆకర్షించి ఇంటి వాతావరణాన్ని కలుషితం చేస్తుంది. కాబట్టి ఎల్లప్పుడూ మూత ఉన్న డస్ట్ బిన్స్ మాత్రమే వాడాలని డాక్టర్ సూచిస్తున్నారు. - స్కాచ్ బ్రైట్ స్పాంజ్ (Dishwashing Sponges)
కిచెన్‌లో గిన్నెలు కడగడానికి వాడే స్పాంజ్ ఎప్పుడూ తడిగానే ఉంటుంది. ఈ తడి వాతావరణం బ్యాక్టీరియా పెరగడానికి చాలా అనుకూలం. అందుకే దీనిని వాడకపోవడమే మంచిదని, ఒకవేళ వాడినా తరచుగా మారుస్తూ ఉండాలని ఆమె చెబుతున్నారు. - ప్లాస్టిక్ కటింగ్/చాపింగ్ బోర్డ్స్
కూరగాయలు కోయడానికి ప్లాస్టిక్ బోర్డులను వాడటం వల్ల, కత్తితో కోసినప్పుడు ప్లాస్టిక్ ముక్కలు చాలా సూక్ష్మంగా ఆహారంలో కలిసే అవకాశం ఉంది (Microplastics). పైగా ఆ బోర్డుపై ఉండే పగుళ్లలో బ్యాక్టీరియా తిష్టవేస్తుంది. దీనికి బదులుగా చెక్క లేదా స్టెయిన్‌లెస్ స్టీల్ బోర్డులు వాడటం ఉత్తమం. - పాత దిండ్లు (Old Pillows)
చాలా మంది ఏళ్ల తరబడి ఒకే దిండును వాడుతుంటారు. కాలక్రమేణా దిండులో చెమట, ధూళి, చనిపోయిన చర్మ కణాలు (Dead skin) మరియు బ్యాక్టీరియా పేరుకుపోతాయి. ఇది చర్మ అలర్జీలు, మొటిమలు మరియు శ్వాస సంబంధిత సమస్యలకు దారితీస్తుంది. ప్రతి రెండు ఏళ్లకు ఒకసారి దిండును మార్చడం అవసరం. - బెడ్ షీట్లు మరియు పిల్లో కవర్లు
రెండు వారాల కంటే ఎక్కువ కాలం ఒకే బెడ్ షీట్ లేదా పిల్లో కవర్ వాడటం ఆరోగ్యానికి మంచిది కాదు. నిత్యం వాడటం వల్ల వీటిలో క్రిములు చేరి ఫంగల్ ఇన్ఫెక్షన్లు మరియు అస్తమా వచ్చేలా చేస్తాయి. వీటిని కనీసం వారానికి ఒకసారి ఉతకాలని డాక్టర్ సలహా ఇస్తున్నారు.