కోయంబత్తూర్: జనన మరణాలు సహజమే కానీ, కళ్లముందే చనిపోయి అంత్యక్రియలకు సిద్ధమైన వ్యక్తి అకస్మాత్తుగా నడుచుకుంటూ వస్తే? సరిగ్గా ఇలాంటి వింత ఘటనే తమిళనాడులోని పొల్లాచి సమీపంలో చోటుచేసుకుంది. చనిపోయాడనుకున్న తండ్రికి అంత్యక్రియలు నిర్వహిస్తుండగా, ఆయన ప్రాణాలతో ఉన్నాడనే వార్త రావడంతో బంధువులంతా ఆశ్చర్యానందాల్లో మునిగిపోయారు.
అసలేం జరిగిందంటే?
కోయంబత్తూరు జిల్లా ఆనైమలై సమీపంలోని పెత్తనాయకనూర్ గ్రామానికి చెందిన మరుతముత్తు (63) కొద్దిరోజుల క్రితం అకస్మాత్తుగా అదృశ్యమయ్యాడు. దీనిపై అతని కుమారుడు కాళిదాస్ పోలీసులకు ఫిర్యాదు చేశాడు. ఈ క్రమంలోనే తెన్ సంగంపాళయం వైన్ షాపు సమీపంలో ఒక వృద్ధుడు స్పృహతప్పి పడి ఉండగా, పోలీసులు అతడిని ఆసుపత్రికి తరలించారు. చికిత్స పొందుతూ ఆ వృద్ధుడు మరణించాడు.
గుర్తుపట్టడంలో తండ్రీకొడుకుల పోలికల తిరకాసు!
పోలీసులు కాళిదాస్‌ను పిలిపించి మృతదేహాన్ని చూపించగా, చనిపోయిన వ్యక్తి తన తండ్రి మరుతముత్తుేనని అతను ధృవీకరించాడు. ఇద్దరి పోలికలు ఒకేలా ఉండటంతో కుమారుడు కన్నీరుమున్నీరై మృతదేహాన్ని తన గ్రామానికి తీసుకెళ్లాడు. అంత్యక్రియల కోసం వేల రూపాయలు ఖర్చు చేసి, బంధుమిత్రులందరూ చేరుకుని కడసారి వీడ్కోలు పలుకుతున్నారు.
అంత్యక్రియల వేళ అనూహ్య మలుపు!
సరిగ్గా అంత్యక్రియలు జరుగుతున్న సమయంలోనే అసలు మలుపు తిరిగింది. చనిపోయాడనుకున్న మరుతముత్తు సమీపంలోని సమత్తూర్ వద్ద నడుచుకుంటూ వెళ్తుండగా కొందరు బంధువులు చూశారు. వెంటనే ఆ దృశ్యాన్ని వీడియో తీసి కాళిదాస్‌కు పంపారు. ఆ వీడియో చూసి షాక్‌కు గురైన కుటుంబ సభ్యులు వెంటనే అంత్యక్రియలు నిలిపివేసి పోలీసులను ఆశ్రయించారు. విచారణలో మరుతముత్తు క్షేమంగా ఉన్నాడని తేలింది.
పోలీసుల వివరణ:
ఈ గందరగోళంపై పోలీసులు స్పందిస్తూ.. “మరుతముత్తుతో పాటు అదే వయసున్న మరో వ్యక్తి కూడా అదే సమయంలో ఆసుపత్రిలో చేరారు. ఇద్దరి రూపం ఒకేలా ఉండటంతో ఈ పొరపాటు జరిగింది. పైగా కుమారుడే స్వయంగా తన తండ్రి అని గుర్తుపట్టడంతో మేము మృతదేహాన్ని అప్పగించాము. ఇందులో పోలీసుల తప్పేమీ లేదు” అని వివరించారు.
ప్రస్తుతం ఆ గుర్తుతెలియని మృతదేహాన్ని తిరిగి ఆసుపత్రికి తరలించారు. తన తండ్రి ప్రాణాలతో తిరిగి రావడంతో అంతవరకు విషాదంలో ఉన్న ఆ కుటుంబంలో సంతోషం వెల్లివిరిసింది. ఈ వింత ఘటన ఇప్పుడు పొల్లాచి ప్రాంతంలో హాట్ టాపిక్‌గా మారింది.