చెన్నై: చెన్నై-తిరుచ్చి జాతీయ రహదారిపై 14 ఏళ్ల బాలికపై సామూహిక అత్యాచారం జరిగిన ఘటన స్థానికంగా తీవ్ర కలకలం రేపుతోంది. ఈ అమానుషానికి పాల్పడిన ఇద్దరు వ్యక్తుల కోసం పోలీసులు గాలింపు చర్యలు ముమ్మరం చేశారు.
అసలేం జరిగిందంటే?
చెన్నై సమీపంలోని తాంబరానికి చెందిన ఓ 17 ఏళ్ల బాలుడు, తనతో పాటు 16 ఏళ్ల ఒక బాలికను, 14 ఏళ్ల మరో బాలికను తన ద్విచక్ర వాహనంపై ఎక్కించుకుని మధురాంతకం సమీపంలోని తన గ్రామానికి బయలుదేరాడు. అర్ధరాత్రి సమయంలో వారు జాతీయ రహదారిపై వెళ్తుండగా.. ఇద్దరు వ్యక్తులు మద్యం మత్తులో వారిని బైక్‌పై వెంబడించారు.
వెంబడిస్తున్న వారిని చూసి భయపడిన బాలుడు బైక్‌ను వేగంగా నడపడంతో, నియంత్రణ కోల్పోయి వాహనం కిందపడిపోయింది. ఈ ప్రమాదంలో ఇద్దరు బాలికలకు గాయాలయ్యాయి. వెంటనే వెంబడిస్తున్న వ్యక్తులు అక్కడికి చేరుకోవడంతో, బాలుడు భయంతో 16 ఏళ్ల బాలికను మాత్రమే తన బైక్‌పై ఎక్కించుకుని అక్కడి నుండి తప్పించుకున్నాడు.
గాయపడిన బాలికపై దారుణం
తీవ్రంగా గాయపడి అక్కడే ఉండిపోయిన 14 ఏళ్ల బాలికను ఆ ఇద్దరు దుండగులు తమ బైక్‌పై ఎక్కించుకుని తీసుకెళ్లి, నిర్మానుష్య ప్రాంతంలో సామూహిక అత్యాచారానికి పాల్పడినట్లు సమాచారం. మరుసటి రోజు బాధితురాలు చెంగల్పట్టు ప్రభుత్వ ఆసుపత్రిలో చేరడంతో ఈ దారుణం వెలుగులోకి వచ్చింది. మేల్మరువత్తూర్ మహిళా పోలీసులు ఈ ఘటనపై కేసు నమోదు చేసి నిందితుల కోసం గాలిస్తున్నారు.
చెన్నైలో మరో రెండు ఘటనలు..
రాయపురంలో ఒక 9 ఏళ్ల బాలిక పాఠశాల నుండి ఇంటికి వెళ్తుండగా, ఆమెను వెంబడించి లైంగిక వేధింపులకు పాల్పడిన 54 ఏళ్ల గణేషన్ అనే వ్యక్తిని పోలీసులు పోక్సో (POCSO) చట్టం కింద అరెస్ట్ చేసి జైలుకు తరలించారు.
అదేవిధంగా, మధురవాయిల్‌లో నడుచుకుంటూ వెళ్తున్న 41 ఏళ్ల మహిళ పట్ల అసభ్యంగా ప్రవర్తించిన ఒడిశాకు చెందిన సూరజ్ పాత్ర (24) అనే యువకుడిని పోలీసులు అదుపులోకి తీసుకున్నారు.
వరుసగా జరుగుతున్న ఇటువంటి ఘటనలు మహిళలు, బాలికల భద్రతపై ఆందోళన కలిగిస్తున్నాయి.