దుబాయ్/న్యూఢిల్లీ: ఇరాన్ భీకర దాడులతో పశ్చిమాసియా అట్టుడుకుతున్న వేళ, సుమారు 40 లక్షల మంది భారతీయుల గురించి యునైటెడ్ అరబ్ ఎమిరేట్స్ (UAE) చేసిన ప్రకటన ఇప్పుడు ప్రపంచవ్యాప్తంగా చర్చనీయాంశమైంది. ఒకవైపు పాకిస్థానీయులు యూఏఈ ప్రతిష్టను దెబ్బతీయాలని చూస్తుంటే, అక్కడ నివసిస్తున్న భారతీయులు మాత్రం ప్రాణాలకు తెగించి ఆ దేశానికి అండగా నిలుస్తున్నారు.
కుట్రలను తిప్పికొడుతున్న భారతీయులు
ఇరాన్ దాడుల సాకుతో పాకిస్థాన్, టర్కీ వంటి దేశాలు సోషల్ మీడియాలో యూఏఈపై విషం చిమ్ముతున్నాయి. యూఏఈ ఇక సురక్షితం కాదని, అక్కడి నివాస ప్రాంతాలపై ఇరాన్ డ్రోన్లు దాడులు చేస్తున్నాయని తప్పుడు ప్రచారాలు చేస్తున్నాయి. బ్రిటీష్ ఎయిర్‌వేస్ వంటి సంస్థలు అబుదాబికి విమాన సర్వీసులను నిలిపివేయడం కూడా ఈ నెగటివ్ పబ్లిసిటీలో భాగమేనని విశ్లేషకులు భావిస్తున్నారు.
అయితే, అదే యూఏఈలో ఉంటున్న భారతీయులు మాత్రం ఆ దేశంపై తమ కృతజ్ఞతను చాటుకుంటున్నారు:
సేవా కార్యక్రమాలు: చిక్కుకుపోయిన వారిని రక్షించడంలో, సహాయక చర్యల్లో భారతీయ కమ్యూనిటీ ముందుంటోంది.
రక్తదానం: వందలాది మంది భారతీయులు రక్తదాన శిబిరాలు ఏర్పాటు చేసి ఆపదలో ఉన్నవారిని ఆదుకుంటున్నారు.
ముస్లింలకు అండగా: రంజాన్ మాసం కావడంతో ముస్లిం కుటుంబాలకు ఇఫ్తార్ విందులు, భోజన వసతులు కల్పిస్తున్నారు.
వ్యాపారవేత్తల చొరవ: యూఏఈలోని దిగ్గజ భారతీయ వ్యాపారవేత్తలు సామాన్య ప్రజల సహాయార్థం భారీగా నిధులు సమకూరుస్తున్నారు.
మోదీపై యూఏఈ ప్రశంసల జల్లు
భారతీయుల ఈ నిస్వార్థ సేవలను చూసి భారత్‌లో యూఏఈ రాయబారి అబ్దుల్ నాసిర్ జమాల్ అల్ శాలీ సంచలన వ్యాఖ్యలు చేశారు.
“భారతీయులు తాము ఒంటరి అని ఎప్పుడూ భావించకూడదు. మా దేశంలో మీరు ఎప్పుడూ సురక్షితంగా ఉంటారు. యూఏఈ నాయకత్వం భారతీయులను తమ కుటుంబ సభ్యులుగా భావిస్తుంది. ప్రధాని మోదీ మా కోసం ఏం చేశారో ప్రపంచం మొత్తానికి తెలియాలి.” అని ఆయన పేర్కొన్నారు.
భారత్‌పైనే అందరి ఆశలు!
ప్రధాని మోదీ కేవలం ఒక్క ఫోన్ కాల్ చేస్తే చాలు.. ఈ యుద్ధం ఆగిపోతుందని యూఏఈ గట్టిగా నమ్ముతోంది. పశ్చిమాసియాను యుద్ధ జ్వాలల నుండి కాపాడగల శక్తి ఒక్క భారత్‌కే ఉందని, ఇంధన మార్కెట్ మరియు భద్రత విషయంలో భారత్ కీలకంగా మారిందని యూఏఈ రాయబారి స్పష్టం చేశారు. ఒకవైపు పాకిస్థాన్ గూఢచారులు కుట్రలు పన్నుతుంటే, భారత్ మాత్రం ‘వసుధైక కుటుంబం’ అనే రీతిలో యూఏఈకి భరోసానిస్తోంది.