క్రీడలు: ఐపీఎల్ 2026 ప్రారంభానికి ముందే అభిమానుల్లో ఉత్సాహం ఉరకలెత్తుతోంది. ఈ క్రమంలో రాజస్థాన్ రాయల్స్ షేర్ చేసిన ఒక వీడియో ఇప్పుడు సోషల్ మీడియాలో సెన్సేషన్ క్రియేట్ చేస్తోంది. భారత స్టార్ ఆల్‌రౌండర్ రవీంద్ర జడేజా గ్రాండ్ ఎంట్రీకి సంబంధించిన ఈ వీడియో చూసి ఫ్యాన్స్ ఫిదా అవుతున్నారు.
జడేజా ధమాకా ఎంట్రీ
ఐపీఎల్ 2026 సీజన్ కోసం రవీంద్ర జడేజా మళ్లీ రాజస్థాన్ రాయల్స్ గూటికి చేరుకున్నారు. మార్చి 10న ఆయన టీమ్ ప్రీ-సీజన్ క్యాంప్‌నకు చేరుకోగా, ఆటగాళ్లు మరియు సపోర్ట్ స్టాఫ్ చప్పట్లతో ఘనస్వాగతం పలికారు. ఫ్రాంచైజీ షేర్ చేసిన వీడియోలో జడేజా కారు దిగి స్టేజ్ పైకి వస్తున్న తీరు చూస్తుంటే.. అచ్చం ‘రెహమాన్ డకైత్’ లాగే ఉందంటూ నెటిజన్లు కామెంట్స్ చేస్తున్నారు.
ఫిల్మీ స్టైల్‌లో అదిరిపోయే డైలాగ్
ఈ వీడియోలో హైలైట్ ఏంటంటే.. జడేజా తన ఎంట్రీని పూర్తి ఫిల్మీ స్టైల్‌లో ప్లాన్ చేశారు. ‘దురందర్’ (Dhurandhar) సినిమాలోని ఒక ఫేమస్ సీన్‌ను ఆయన రీక్రియేట్ చేశారు. స్టేజ్ పైకి రాగానే.. అక్షయ్ ఖన్నా డైలాగ్‌ను గుర్తుచేస్తూ, “ఖమ్మా ఘణి.. రాజస్థాన్” అంటూ స్టైలిష్‌గా పలకరించారు. ఈ వీడియో ఇప్పుడు ఇంటర్నెట్‌లో తెగ వైరల్ అవుతోంది.
మళ్లీ 2008 జ్ఞాపకాలు..
జడేజా రాజస్థాన్ రాయల్స్‌లోకి తిరిగి రావడం అభిమానులకు పాత జ్ఞాపకాలను గుర్తు చేస్తోంది. ఆయన 2008, 2009 సీజన్లలో ఈ జట్టులో సభ్యుడిగా ఉన్నారు. 2008లో షేన్ వార్న్ కెప్టెన్సీలో రాజస్థాన్ టైటిల్ గెలిచినప్పుడు జడేజా ఆ జట్టులో కీలక పాత్ర పోషించారు. ఆ తర్వాత ఆయన చెన్నై సూపర్ కింగ్స్‌కు మారి సుదీర్ఘ కాలం అక్కడ కొనసాగారు.
ట్రేడ్ డీల్‌తో మారిన జట్లు
ఐపీఎల్ 2026 వేలానికి ముందు జరిగిన ఒక భారీ ట్రేడ్ డీల్ వల్ల జడేజా రాజస్థాన్ జట్టులోకి రావడం సాధ్యమైంది. ఈ డీల్‌లో భాగంగా:
సంజూ శాంసన్: చెన్నై సూపర్ కింగ్స్ (CSK) జట్టులోకి వెళ్లారు.
రవీంద్ర జడేజా & సామ్ కర్రన్: రాజస్థాన్ రాయల్స్ (RR) జట్టులోకి వచ్చారు.
కెప్టెన్‌గా రియాన్ పరాగ్
జడేజా జట్టులోకి రావడంతో ఆయనకే కెప్టెన్సీ ఇస్తారని అందరూ భావించారు. కానీ రాజస్థాన్ రాయల్స్ యాజమాన్యం అందరినీ ఆశ్చర్యపరుస్తూ.. ఐపీఎల్ 2026 సీజన్ కోసం రియాన్ పరాగ్‌ను కెప్టెన్‌గా ప్రకటించింది.