అమెరికా అధ్యక్షుడు డోనాల్డ్ ట్రంప్ శుక్రవారం అర్ధరాత్రి సోషల్ మీడియాలో చేసిన వరుస పోస్ట్‌లను ‘డైలీ బీస్ట్’ పత్రిక ఒక ‘తీవ్రమైన మానసిక ఆందోళన’ (Twisted meltdown) గా అభివర్ణించింది.
ఇరాక్‌లో కూలిపోయిన KC-135 సైనిక ఇంధన విమానంలోని ఆరుగురు సిబ్బంది మరణించినట్లు ధృవీకరించిన తర్వాత 79 ఏళ్ల ట్రంప్ వరుస పోస్ట్‌లు చేశారు. ఈ ప్రమాదంపై ప్రస్తుతం దర్యాప్తు జరుగుతోంది. అయితే, ఇది శత్రువుల దాడి వల్ల గానీ లేదా పొరపాటున జరిగిన కాల్పుల వల్ల గానీ జరగలేదని అమెరికా సెంట్రల్ కమాండ్ పేర్కొంది.
తన ‘ట్రూత్ సోషల్’ పోస్ట్‌లో ట్రంప్ మాట్లాడుతూ.. అమెరికా “ఇరాన్‌లోని ఉగ్రవాద పాలనను పూర్తిగా నాశనం చేస్తోంది” అని, ఇరాన్ పాలకులను “చంపడం” తనకు దక్కిన “గొప్ప గౌరవం” అని పేర్కొన్నారు.
“మా వద్ద సాటిలేని శక్తి, అపరిమితమైన మందుగుండు సామాగ్రి మరియు కావాల్సినంత సమయం ఉంది – ఈ పిచ్చి వెధవలకు (scumbags) ఈరోజు ఏం జరుగుతుందో చూడండి” అని ఆయన హెచ్చరించారు. “వారు 47 ఏళ్లుగా ప్రపంచవ్యాప్తంగా అమాయకులను చంపుతున్నారు, ఇప్పుడు అమెరికా 47వ అధ్యక్షుడిగా నేను వారిని చంపుతున్నాను” అని ట్రంప్ రాసుకొచ్చారు.
అంతేకాకుండా, ఇరాన్ నౌకాదళం, వాయుసేన, క్షిపణులు మరియు డ్రోన్లన్నీ నాశనమయ్యాయని, వారి నాయకులు భూమిపై నుండి తుడిచిపెట్టుకుపోయారని ఆయన పేర్కొన్నారు.
మీడియా నివేదికలపై ట్రంప్ ఆగ్రహం
యుద్ధం వల్ల పెరుగుతున్న ఖర్చులపై వస్తున్న వార్తా కథనాల పట్ల ట్రంప్ తీవ్ర అసహనం వ్యక్తం చేశారు. అలాగే, మినాబ్ (Minab) లోని బాలికల ప్రాథమిక పాఠశాలపై జరిగిన దాడిలో అమెరికా ప్రమేయంపై వస్తున్న విమర్శలను ఆయన ఎదుర్కొంటున్నారు. ఈ దాడిపై రిపోర్టర్ షాన్ మెక్‌క్రీష్ ప్రశ్నించగా, ట్రంప్ కోపంతో.. “దాని గురించి నాకు తగినంత సమాచారం లేదు, అది దర్యాప్తులో ఉంది” అని బదులిచ్చారు.
న్యూయార్క్ టైమ్స్ వంటి పత్రికలు యుద్ధంలో అమెరికా ఓడిపోతున్నట్లు తప్పుడు ప్రచారం చేస్తున్నాయని ఆయన ఆరోపించారు.
ఇరాన్ సుప్రీం లీడర్‌పై పీట్ హెగ్‌సెత్ సంచలన వ్యాఖ్యలు
మరోవైపు, అమెరికా రక్షణ కార్యదర్శి పీట్ హెగ్‌సెత్ శుక్రవారం మాట్లాడుతూ.. ఇరాన్ కొత్త సుప్రీం లీడర్ మోజ్తబా ఖమేనీ తీవ్రంగా గాయపడ్డారని, అతని ముఖం కూడా వికృతమై ఉండవచ్చని (Disfigured) తెలిపారు. యుద్ధం మొదటి రోజే అలీ ఖమేనీ కుమారుడు గాయపడినట్లు వస్తున్న వార్తలను ఆయన ధృవీకరించారు.
“ఇరాన్ నాయకత్వం దిక్కుతోచని స్థితిలో ఉంది, ఎలుకల్లా భూగర్భంలో దాక్కున్నారు. కొత్తగా ఎన్నికైన ఆ నాయకుడు గాయపడి ఉన్నాడని మాకు తెలుసు” అని హెగ్‌సెత్ విలేకరులతో చెప్పారు.