ఇస్లామాబాద్/వాషింగ్టన్: తీవ్ర ఆర్థిక సంక్షోభంతో కొట్టుమిట్టాడుతున్న పాకిస్థాన్‌కు అగ్రరాజ్యం అమెరికా కోలుకోలేని షాక్ ఇచ్చింది. ఇన్నాళ్లూ ఒకవైపు అమెరికా నుంచి సాయం పొందుతూ, మరోవైపు చైనా, ఇరాన్‌లతో రహస్య ఒప్పందాలు చేసుకుంటున్న పాక్ ‘డబుల్ గేమ్’పై అమెరికా నిప్పులు చెరిగింది.
అమెరికా హెచ్చరిక: “పిచ్చా.. బిచ్చమా?”
పాకిస్థాన్ తీరుపై విసిగిపోయిన అమెరికా, ఈసారి అత్యంత కఠినమైన హెచ్చరికలు జారీ చేసింది.
భారత్ విషయంలో నో సపోర్ట్: “ఇకపై భారత్ మీపై దాడి చేస్తే మేము జోక్యం చేసుకోం. మీ రక్షణ బాధ్యత మాది కాదు” అని అమెరికా స్పష్టం చేసినట్లు తెలుస్తోంది.
చైనా, ఇరాన్‌లతో కట్: చైనాతో సంబంధాలను తెంచుకోవాలని, ఇరాన్‌కు మద్దతు ఇవ్వడం ఆపాలని అల్టిమేటం జారీ చేసింది.
దివాళా భయం: అమెరికా ఆర్థిక సాయం నిలిపివేస్తే, పాకిస్థాన్ అంతర్జాతీయంగా బిచ్చమెత్తుకోవాల్సి వస్తుందని, దేశం పూర్తిగా దివాళా తీస్తుందని హెచ్చరించింది.
రాయబార కార్యాలయం మూసివేత!
కేవలం మాటలతోనే కాకుండా, చేతల్లో కూడా అమెరికా తన ప్రతాపాన్ని చూపింది. పెషావర్‌లోని తన రాయబార కార్యాలయాన్ని అమెరికా హఠాత్తుగా మూసివేసింది. భద్రతా కారణాలని చెబుతున్నప్పటికీ, ఇది పాక్ ప్రభుత్వానికి అమెరికా పంపిన బలమైన రాజకీయ సంకేతంగా విశ్లేషకులు భావిస్తున్నారు.
మొండిచేయి చూపిన సౌదీ అరేబియా
మరోవైపు, దేశాన్ని గట్టెక్కించేందుకు పాక్ ఆర్మీ చీఫ్ అసిమ్ మునీర్, ప్రధాని షాబాజ్ షరీఫ్ కలిసి సౌదీ అరేబియాకు వెళ్లి భారీగా నిధులు కావాలని వేడుకున్నారు. అయితే, గతంలోలాగా ఉచితంగా సాయం చేయడానికి సౌదీ నిరాకరించింది. పాక్ వద్ద ఉన్న అత్యాధునిక యుద్ధ విమానాలు, రాడార్ సాంకేతికతను తమకు అప్పగించాలని, ప్రాంతీయ వివాదాల్లో తమకు మద్దతు ఇవ్వాలని సౌదీ కఠిన నిబంధనలు పెట్టినట్లు సమాచారం.
బిగుస్తున్న ఉచ్చు
అటు IMF (అంతర్జాతీయ ద్రవ్య నిధి) కఠినమైన షరతులు, ఇటు అమెరికా హెచ్చరికలు, మరోవైపు సౌదీ మొండిచేయి.. ఇలా అన్ని వైపుల నుంచి పాకిస్థాన్‌కు ఉచ్చు బిగుస్తోంది. చైనా నిర్మిస్తున్న ‘CPEC’, గ్వాదర్ పోర్ట్ ప్రాజెక్టుల విషయంలో పాక్ వెనక్కి తగ్గకపోతే, అంతర్జాతీయంగా ఒంటరిని చేస్తామని అమెరికా పరోక్షంగా చెప్పకనే చెప్పింది.