ఇరాన్-అమెరికా యుద్ధం 15వ రోజుకు చేరుకుంది. హోర్ముజ్ జలసంధి మూతపడటంతో ప్రపంచవ్యాప్తంగా చమురు సంక్షోభం గరిష్ట స్థాయికి చేరుకుంది. ఈ క్లిష్ట సమయంలో రష్యా చమురు విషయంలో అమెరికా ద్వంద్వ వేషాలు వేస్తోందని ఇరాన్ బహిరంగంగా విమర్శించింది.
గతంలో ఉక్రెయిన్ యుద్ధాన్ని సాకుగా చూపి రష్యా నుండి చమురు కొనుగోళ్లను నిలిపివేయాలని భారత్‌ను బెదిరించిన అమెరికా, ఇప్పుడు ఇరాన్‌తో యుద్ధం వల్ల చమురు కొరత ఏర్పడటంతో.. అదే రష్యా చమురును కొనమని భారత్ వంటి దేశాలను బ్రతిమాలుతోందని ఇరాన్ ఎద్దేవా చేసింది. ఇది అమెరికా విదేశాంగ విధానంలో అతిపెద్ద పతనంగా కనిపిస్తోందని విశ్లేషకులు భావిస్తున్నారు.
అమెరికాపై ఇరాన్ విదేశాంగ మంత్రి ధ్వజం:
ఇరాన్ విదేశాంగ మంత్రి సయ్యద్ అబ్బాస్ అరగ్చి సోషల్ మీడియా వేదికగా అమెరికా, యూరప్ దేశాల తీరును తప్పుబట్టారు. “కేవలం రెండు వారాల యుద్ధానికే చమురు ధరలను నియంత్రించలేక వైట్ హౌస్ ఉక్కిరిబిక్కిరి అవుతోంది. ఇప్పుడు భారత్‌ను రష్యా చమురు కొనమని బ్రతిమాలడం చాలా దారుణం” అని ఆయన విమర్శించారు. అంతర్జాతీయ మార్కెట్‌లో బ్యారెల్ ముడి చమురు ధర 100 డాలర్లు దాటిన తర్వాతే ట్రంప్ ప్రభుత్వం రష్యా చమురుపై ఆంక్షలను సడలించడం గమనార్హం.
భారత్‌కు ఇరాన్ అభయం:
యుద్ధ ఉద్రిక్తతల మధ్య భారత్‌తో తన స్నేహాన్ని ఇరాన్ మరోసారి చాటుకుంది. “హోర్ముజ్ జలసంధిలో భారత్‌కు వెళ్లే నౌకలకు రక్షణ ఉంటుందా?” అన్న ప్రశ్నకు, భారత్‌లోని ఇరాన్ రాయబారి మహమ్మద్ ఫతాలీ సానుకూలంగా స్పందించారు. “ఖచ్చితంగా! భారత్ మరియు ఇరాన్ ఉమ్మడి ప్రయోజనాలు కలిగిన మంచి మిత్రులు. భారత్‌కు చమురు సరఫరాలో ఎటువంటి అడ్డంకులు ఉండవు” అని ఆయన హామీ ఇచ్చారు.
నెటిజన్ల స్పందన:
ఈ పరిణామాలపై భారత నెటిజన్లు సోషల్ మీడియాలో భారీగా స్పందిస్తున్నారు. “మాకు అవసరమైతే కొంటాం, లేదంటే ఆపుతాం.. మాకు ఆదేశాలివ్వడానికి నువ్వు ఎవరు?” అంటూ అమెరికాను ప్రశ్నిస్తున్నారు. అంతర్జాతీయ వేదికపై భారత్ ప్రాముఖ్యత పెరగడం, ఇరాన్ వంటి దేశాలు భారత్‌కు ప్రత్యేక రాయితీలు ఇవ్వడం అంతా మోదీ దౌత్య నీతికి నిదర్శనమని, ట్రంప్ కూడా మోదీ ముందు తలవంచాల్సిందేనని నెటిజన్లు కామెంట్స్ చేస్తున్నారు.