పెడన: అతను ఒక చిన్న నగల దుకాణంలో గుమస్తా. కానీ పెళ్లి మాత్రం కోటీశ్వరుడి రేంజ్‌లో చేసుకున్నాడు. ఆ హంగూ ఆర్భాటం చూసి మురిసిపోవాల్సిన యజమానులకు ఎక్కడో అనుమానం కొట్టింది. “మా దగ్గర పనిచేసే జీతగాడికి ఇంత డబ్బు ఎక్కడిది?” అని ఆరా తీస్తే.. కృష్ణా జిల్లా పెడనలో ఒక భారీ కుంభకోణం బయటపడింది.
నమ్మకమే అతడి పెట్టుబడి..
పెడన పట్టణానికి చెందిన సదరు యువకుడు స్థానికంగా ఉన్న ఒక ప్రముఖ బంగారు నగల దుకాణంలో ప్రధాన గుమస్తాగా పనిచేసేవాడు. యజమానులు మరో చోట ఉండటంతో, షాపు బాధ్యతలన్నీ అతనే చూసుకునేవాడు. ఈ నమ్మకాన్నే ఆ యువకుడు ఆసరాగా చేసుకున్నాడు. గత కొంతకాలంగా మెల్లమెల్లగా బంగారు, వెండి ఆభరణాలను పక్కదారి పట్టించడం మొదలుపెట్టాడు.
పెళ్లిలో అట్టహాసం.. యజమానుల ఆశ్చర్యం!
సుమారు నెల రోజుల క్రితం ఈ యువకుడి వివాహం అత్యంత వైభవంగా జరిగింది. సాధారణ గుమస్తా స్థాయిని మించి లక్షలు పోసి డెకరేషన్లు, భారీ విందులు ఏర్పాటు చేశాడు. ఈ వేడుకకు నగల షాపు యజమానులు కూడా హాజరయ్యారు. పెళ్లి వైభవం చూసి వారు ఆశీర్వదించాల్సింది పోయి, ఆశ్చర్యపోయారు. ఈ ఖర్చుకు మూలం ఎక్కడని ఆలోచనలో పడ్డారు.
లెక్కలు తీస్తే.. గుండె గుభేల్!
పెళ్లి ముగిసిన తర్వాత యజమానులు హుటాహుటిన షాపులో స్టాక్ వెరిఫికేషన్ చేశారు. తీరా లెక్కలు తేల్చితే దాదాపు రూ.1.50 కోట్ల విలువైన బంగారు, వెండి ఆభరణాలు మాయమైనట్లు తేలింది. షాక్ తిన్న యజమానులు యువకుడిని పిలిచి గట్టిగా నిలదీయడంతో అసలు నిజం ఒప్పుకోక తప్పలేదు.
ఇంట్లో వెండి బిందెలు.. పోలీసుల నిశ్శబ్దం?
యజమానులు ఆ యువకుడి ఇంటికి వెళ్లి వెతకగా, షాపు నుంచి మాయం చేసిన వెండి బిందెలు, లక్షలాది రూపాయల నగదు లభ్యమైనట్లు సమాచారం. అయితే, ఈ వ్యవహారంపై యజమానులు పోలీసులకు ఫిర్యాదు చేసినప్పటికీ, కేసు నమోదు చేయకుండా పెండింగ్‌లో పెట్టడం ఇప్పుడు చర్చనీయాంశంగా మారింది. తెర వెనుక ఏదైనా రాజీ ప్రయత్నాలు జరుగుతున్నాయా అన్న అనుమానాలు వ్యక్తమవుతున్నాయి.
మొత్తానికి, ఆడంబరంగా పెళ్లి చేసుకుని సమాజంలో ‘పెద్ద’ మనిషి అనిపించుకోవాలనుకున్న ఆ యువకుడు, అదే ఆడంబరం వల్ల అడ్డంగా దొరికిపోయి ఇప్పుడు తలదించుకున్నాడు.