టెహ్రాన్: అమెరికా-ఇజ్రాయెల్ మరియు ఇరాన్ మధ్య జరుగుతున్న యుద్ధం రోజురోజుకూ ఊహించని స్థాయికి చేరుకుంటోంది. ఈ పోరులో ఇప్పటివరకు ఇతర దేశాలు నేరుగా జోక్యం చేసుకోకపోయినప్పటికీ, రష్యా అందిస్తున్న నిఘా సమాచారం (Intelligence Data) ఇందులో కీలక పాత్ర పోషిస్తున్నట్లు తెలుస్తోంది.
అంతరిక్షం నుండి యుద్ధం: మధ్యప్రాచ్య దేశాల మధ్య జరుగుతున్న ఈ పోరు ఇప్పుడు అంతరిక్ష సమాచారం ఆధారంగా నిర్ణయించబడే స్థితికి చేరుకుంది. అమెరికా యుద్ధ నౌకలు, విమానాల కచ్చితమైన స్థావరాలతో సహా కీలకమైన నిఘా సమాచారాన్ని రష్యానే ఇరాన్‌కు అందిస్తోందని ‘వాషింగ్టన్ పోస్ట్’ వెల్లడించింది. ఆధునిక యుద్ధ తంత్రంలో కేవలం దాడులు చేయడమే కాకుండా, శత్రువుల సమాచారాన్ని ఎలా సేకరిస్తున్నారనేదే ముఖ్యం. ఈ విషయంలో రష్యా శాటిలైట్ డేటా ఇరాన్‌కు ఒక ‘గేమ్ ఛేంజర్’ ఆయుధంగా మారింది.
రష్యా పాత్ర: రష్యా ఈ యుద్ధంలో నేరుగా పాల్గొనలేదు. యుద్ధం ప్రారంభమైనప్పటి నుండి ఇరాన్‌కు మద్దతుగా, అమెరికాకు వ్యతిరేకగానే రష్యా వ్యాఖ్యానిస్తోంది. అయితే, తెరవెనుక ఉండి అమెరికా దళాలు, నౌకలు మరియు విమానాల కదలికల డేటాను ఇరాన్‌కు అందిస్తోందని ‘సీఎన్ఎన్’ (CNN) పేర్కొంది. రష్యా ఈ వార్తలను ఖండిస్తున్నప్పటికీ, అంతర్జాతీయ నిపుణులు మాత్రం ఈ రెండు దేశాల మధ్య నిఘా సమాచార మార్పిడి జరిగే అవకాశం నూటికి నూరు శాతం ఉందని చెబుతున్నారు.
ఖచ్చితమైన దాడులు – అమెరికా ఆందోళన: రష్యా అందించిన సమాచారంతో ఇరాన్ చేస్తున్న దాడులు అమెరికాను కలవరపెడుతున్నాయి. కువైట్‌లోని అమెరికా సైనిక స్థావరాలపై ఇరాన్ డ్రోన్లు జరిపిన దాడిలో ఆరుగురు సైనికులు ప్రాణాలు కోల్పోయారు. ఇరాన్ ఇంత కచ్చితత్వంతో ఎలా దాడి చేయగలిగింది అనే ప్రశ్నలకు రష్యా ఇంటెలిజెన్స్ సహాయమే సమాధానమని భావిస్తున్నారు.
యుద్ధం ఎప్పుడు ముగుస్తుంది? ఫిబ్రవరి 28న యుద్ధం ప్రారంభమైన మొదటి రోజే ఇరాన్ సుప్రీం లీడర్ ఖమేనీ మరణించడంతో యుద్ధం త్వరగా ముగుస్తుందని అందరూ భావించారు. కానీ, ఇరాన్ నిరంతరం ప్రతిదాడి చేస్తూనే ఉంది. దీనివల్ల మధ్యప్రాచ్యం అంతటా ఉద్రిక్తతలు పెరిగిపోయి, సాధారణ స్థితి దెబ్బతిన్నది. రష్యా ఇస్తున్న ఈ సహకారం ట్రంప్ ప్రభుత్వానికి అంతర్జాతీయ స్థాయిలో పెద్ద సవాలుగా మారింది.