పశ్చిమ ఆసియాలో కొనసాగుతున్న సైనిక ఉద్రిక్తతల మధ్య, ఇరాన్ సైన్యం సంచలన ప్రకటన చేసింది. తమ గ్యాస్ ఫీల్డ్‌పై జరిగిన దాడికి ప్రతికారంగా గల్ఫ్ దేశాలలోని ఇంధన వనరులను లక్ష్యంగా చేసుకుంటామని హెచ్చరించింది. దీనితో సౌదీ అరేబియా, యూఏఈ (UAE), మరియు ఖతార్‌లోని పలు చమురు, గ్యాస్ సౌకర్యాలకు ముప్పు పొంచి ఉంది.
ప్రపంచంలోనే అతిపెద్ద సహజ వాయువు క్షేత్రమైన ‘సౌత్ పార్స్’ (ఇరాన్-ఖతార్ ఉమ్మడి యాజమాన్యం) పై బుధవారం దాడులు జరిగినట్లు ఇరాన్ ప్రభుత్వ మీడియా వెల్లడించింది.
ఇరాన్ లక్ష్యంగా చేసుకున్న 5 ప్రధాన ప్రాంతాలు:
- సమ్రెఫ్ రిఫైనరీ (Samref Refinery): సౌదీ అరేబియా.
- అల్-హసన్ గ్యాస్ ఫీల్డ్ (Al-Hasan Gas Field): యూనైటెడ్ అరబ్ ఎమిరేట్స్ (UAE).
- జుబైల్ పెట్రోకెమికల్ కాంప్లెక్స్: జుబైల్, సౌదీ అరేబియా.
- మెసైడ్ పెట్రోకెమికల్ కాంప్లెక్స్: ఖతార్ (చెవ్రాన్ అనుబంధ సంస్థ).
- రాస్ లఫాన్ రిఫైనరీ (ఫేజ్ 1 & 2): ఖతార్.
ఇజ్రాయెల్‌పై ఖతార్ ఆగ్రహం
సౌత్ పార్స్ గ్యాస్ ఫీల్డ్‌పై జరిగిన దాడికి ఇజ్రాయెలే కారణమని ఖతార్ విదేశాంగ మంత్రి ఆరోపించారు. ఈ చర్యను “ప్రమాదకరమైనది మరియు బాధ్యతారాహిత్యం” అని ఆయన అభివర్ణించారు. కాగా, ఇరాన్ తన మౌలిక సదుపాయాలు దెబ్బతిన్నట్లు ధృవీకరించింది.
ఇరాన్ నిఘా మంత్రి ఎస్మాయిల్ ఖతీబ్ మృతి?
ఇరాన్ నిఘా మంత్రి ఎస్మాయిల్ ఖతీబ్ టెహ్రాన్‌పై జరిగిన దాడుల్లో మరణించారని ఇజ్రాయెల్ రక్షణ మంత్రి ఇజ్రాయెల్ కాట్జ్ బుధవారం ప్రకటించారు. అంతేకాకుండా, ఇరాన్ భద్రతా చీఫ్ అలీ లారిజానీ, ఆయన కుమారుడు మోర్తజా లారిజానీ, మరియు జాతీయ భద్రతా డిప్యూటీ అలీరెజా బయాత్ కూడా ఇజ్రాయెల్ దాడుల్లో మరణించినట్లు సమాచారం. దీనిపై అమెరికా మాజీ అధ్యక్షుడు ట్రంప్ స్పందిస్తూ.. “వారి నాయకులు అంతమయ్యారు, అది ఒక దుష్ట సమూహం” అని వ్యాఖ్యానించారు.
తగ్గేదేలే అంటున్న ఇరాన్ కొత్త సుప్రీం లీడర్
ఇరాన్ కొత్త సుప్రీం లీడర్ మొజ్తబా ఖమేనీ శాంతి చర్చల ప్రతిపాదనలను తోసిపుచ్చారు. “అమెరికా, ఇజ్రాయెల్‌లు మోకాళ్లపై పడి, ఓటమిని అంగీకరించి నష్టపరిహారం చెల్లించే వరకు శాంతికి ఇది సరైన సమయం కాదు” అని ఆయన స్పష్టం చేశారు.
అమెరికా మరియు ఇరాన్ ఘర్షణలు
- అమెరికా దాడి: స్ట్రైట్ ఆఫ్ హార్ముజ్ సమీపంలోని ఇరాన్ క్షిపణి కేంద్రాలపై అమెరికా 5,000 పౌండ్ల బరువున్న శక్తివంతమైన బాంబులతో దాడులు చేసింది. అంతర్జాతీయ నౌకాయానానికి ముప్పుగా మారిన ఇరాన్ యాంటీ-షిప్ క్షిపణులను ధ్వంసం చేయడమే లక్ష్యంగా ఈ దాడులు జరిగాయని అమెరికా సెంట్రల్ కమాండ్ తెలిపింది.
- వాణిజ్య నౌకలపై దాడులు: పర్షియన్ గల్ఫ్ మరియు స్ట్రైట్ ఆఫ్ హార్ముజ్‌లో ప్రయాణిస్తున్న మూడు వాణిజ్య నౌకలపై బుధవారం దాడులు జరిగినట్లు యూకే మారిటైమ్ ట్రేడ్ ఆపరేషన్స్ సెంటర్ పేర్కొంది.