ఆఫ్ఘనిస్థాన్ మరియు పాకిస్థాన్ మధ్య కొనసాగుతున్న ఉద్రిక్తతలకు సంబంధించి ఒక పెద్ద అప్‌డేట్ వెలుగులోకి వచ్చింది. ఈద్ పండుగను పురస్కరించుకుని రెండు దేశాలు తాత్కాలిక కాల్పుల విరమణను ప్రకటించాయి.
సీజ్‌ఫైర్‌కు అంగీకరించిన పాక్-ఆఫ్ఘనిస్థాన్: సౌదీ అరేబియా, టర్కీ మరియు ఖతార్ దేశాల మధ్యవర్తిత్వం తర్వాతే పాకిస్థాన్ ఈ తాత్కాలిక కాల్పుల విరమణకు అంగీకరించినట్లు సమాచారం. దీని ప్రకారం, రాబోయే 5 రోజుల పాటు ఆఫ్ఘనిస్థాన్‌తో ఘర్షణను నిలిపివేయాలని పాకిస్థాన్ నిర్ణయించుకుంది. మార్చి 18-19 అర్ధరాత్రి నుండి మార్చి 23-24 అర్ధరాత్రి వరకు ఈద్ కారణంగా ఆఫ్ఘనిస్థాన్ లేదా టీటీపీ (TTP) స్థావరాలపై పాకిస్థాన్ దాడులు చేయదు.
అయితే, ఈ మధ్యలో ఆఫ్ఘనిస్థాన్ వైపు నుండి ఏదైనా డ్రోన్ దాడి లేదా ఇతర దాడులు జరిగితే, తాము తిరిగి దాడులను ప్రారంభిస్తామని పాకిస్థాన్ స్పష్టం చేసింది.
ఆఫ్ఘనిస్థాన్ స్పందన: ఈద్ దృష్ట్యా పాకిస్థాన్‌తో తాత్కాలిక కాల్పుల విరమణకు సిద్ధమని ఆఫ్ఘనిస్థాన్ కూడా ప్రకటించింది. తాలిబన్ ప్రభుత్వ ప్రతినిధి జబీవుల్లా ముజాహిద్ సోషల్ మీడియా వేదికగా స్పందిస్తూ.. సౌదీ, ఖతార్ మరియు టర్కీల అభ్యర్థన మేరకు ఈద్ వరకు ఘర్షణలు ఉండవని తెలిపారు. అయితే పాకిస్థాన్ దాడి చేస్తే మాత్రం ధీటుగా బదులిస్తామని హెచ్చరించారు.
తమ జాతీయ భద్రత, సార్వభౌమాధికారం మరియు ప్రజల ప్రాణాలను కాపాడటం తమ బాధ్యత అని, ఏవైనా ముప్పులు ఎదురైతే ధైర్యంగా ఎదుర్కొంటామని ఆయన పేర్కొన్నారు. మధ్యవర్తిత్వం వహించిన దేశాలకు ఆయన కృతజ్ఞతలు తెలిపారు.
పాకిస్థాన్ దాడిలో భారీ ప్రాణనష్టం: స్థానిక మీడియా మరియు తాలిబన్ అధికారుల కథనం ప్రకారం.. మార్చి 16న కాబూల్‌లోని 2000 పడకల ‘ఉమీద్’ డ్రగ్ డీ-అడిక్షన్ ఆసుపత్రిపై పాకిస్థాన్ జరిపిన వైమానిక దాడిలో 400 మందికి పైగా మరణించగా, 250 మందికి పైగా గాయపడ్డారు. రాత్రి 9 గంటల సమయంలో జరిగిన ఈ దాడి కాబూల్‌లో ఇటీవల కాలంలో జరిగిన అత్యంత దారుణమైన దాడుల్లో ఒకటిగా అధికారులు అభివర్ణించారు.