షాకింగ్ న్యూస్: మనసును కలచివేసే ఒక దారుణ ఘటనలో, కన్నకూతురిని ఆకలితో, అనారోగ్యంతో అలమటించి చనిపోయేలా వదిలేసినందుకు ఒక దంపతులకు కోర్టు ఎనిమిదేళ్ల జైలు శిక్ష విధించింది. 32 ఏళ్ల స్టెఫీ డేవిస్ మృతదేహం ఇంట్లోని మంచంపై అత్యంత దారుణమైన స్థితిలో లభించింది. ఆమె పరిస్థితి చూసి అక్కడికి చేరుకున్న పారామెడికల్ సిబ్బంది కూడా దిగ్భ్రాంతికి గురయ్యారు.
చాలా నెలల పాటు ఆమె మంచంపైనే పడి ఉన్నప్పటికీ, ఆమెకు ఎలాంటి వైద్యం లేదా కనీస సంరక్షణ అందలేదు. మెడికల్ టీమ్ ఆమె ఇంటికి చేరుకున్నప్పుడు, స్టెఫీ శరీరం అస్థిపంజరంలా మారిపోయింది. శరీరంపై ఇన్ఫెక్షన్ సోకిన లోతైన గాయాలు ఎముకల వరకు కనిపిస్తున్నాయి. గది నిండా దుర్వాసన, జుట్టులో పేలు, ముఖం చుట్టూ ఈగలు ముసురుతున్నాయి. ‘సెప్సిస్’ (రక్తంలో ఇన్ఫెక్షన్) మరియు తీవ్రమైన పోషకాహార లోపం కారణంగా ఆమె మరణించిందని వైద్యులు నిర్ధారించారు.
తల్లిదండ్రులు ఏం దాచారు?
డైలీ మెయిల్ నివేదిక ప్రకారం.. స్టెఫీ చనిపోవడానికి 36 గంటల ముందే ఆమెతో మాట్లాడానని తల్లి కోర్టులో చెప్పింది, కానీ అది పచ్చి అబద్ధమని జడ్జి తేల్చారు. స్టెఫీ చాలా రోజుల క్రితమే మరణించిందని ఫోరెన్సిక్ ఆధారాలు చెబుతున్నాయి. ఆమె మొబైల్ మెసేజ్‌లను పరిశీలిస్తే, ఆమె చాలా నెలలుగా మంచం నుండి లేవలేక సహాయం కోసం అర్థించినా, తల్లిదండ్రులు ఆమెను పూర్తిగా విస్మరించినట్లు వెల్లడైంది. 2016 తర్వాత ఆమెను ఇరుగుపొరుగు వారు ఎప్పుడూ బయట చూడలేదని చెప్పారు. కుటుంబం ఆమెను ఒక గదికే పరిమితం చేసి, బయటి ప్రపంచంతో సంబంధం లేకుండా ఒంటరిని చేసింది.
సమయానికి స్పందిస్తే ప్రాణాలు దక్కేవా?
ఆమెకు ఆహారం, నీరు మరియు కనీసం స్నానం చేయించడంలో సహాయం అందించి ఉంటే, స్టెఫీ ప్రాణాలతో ఉండేదని వైద్యులు అభిప్రాయపడ్డారు. జడ్జి తన తీర్పులో.. “తల్లిదండ్రులు తమ కూతురిని ఎప్పుడూ ప్రేమించలేదు, ఆమె పడుతున్న బాధను వారు కనీసం పట్టించుకోలేదు. స్టెఫీ నరకం అనుభవిస్తున్నప్పుడు, ఈ దంపతులు ఏమీ ఎరగనట్లు తమ జీవితాన్ని సాగించారు,” అని మండిపడ్డారు. ఇది తీవ్రమైన నేరంగా భావిస్తూ కోర్టు వారికి శిక్ష ఖరారు చేసింది.
దురదృష్టవశాత్తు ఇలాంటి ఘటనలు సమాజంలో మనకు తెలియకుండా ఎక్కడో ఒకచోట జరుగుతూనే ఉన్నాయి. మీ పరిసరాల్లో ఎవరైనా ఇలాంటి నిస్సహాయ స్థితిలో ఉన్నట్లు మీకు అనిపిస్తే, వెంటనే స్థానిక అధికారులకు లేదా హెల్ప్‌లైన్ నంబర్లకు సమాచారం అందించండి.