వంట వంటి ఇంటి పనులు భార్య చేయకపోవడం ‘క్రూరత్వం’ (Cruelty) కిందకు రాదని శుక్రవారం ఒక విడాకుల కేసు విచారణ సందర్భంగా సుప్రీంకోర్టు మౌఖికంగా అభిప్రాయపడింది.
“మీరు ఒక పనిమనిషిని పెళ్లి చేసుకోవడం లేదు, జీవిత భాగస్వామిని పెళ్లి చేసుకుంటున్నారు” అని జస్టిస్ సందీప్ మెహతా వ్యాఖ్యానించారు. కాలం మారిందని, భర్త కూడా ఇంటి పనుల్లో పాలుపంచుకోవాలని అత్యున్నత న్యాయస్థానం నొక్కి చెప్పింది. “వంట, వాషింగ్ వంటి పనుల్లో మీరు కూడా సహాయం చేయాలి. ఇప్పటి రోజులు వేరు,” అని జస్టిస్ విక్రమ్ నాథ్ పేర్కొన్నారు.
అంతకుముందు, కోర్టు ఇరు పక్షాలను మధ్యవర్తిత్వం (Mediation) ద్వారా సమస్యను పరిష్కరించుకోమని సూచించినప్పటికీ, అది విఫలమైంది. వీరికి 2017లో వివాహం జరగ్గా, ఎనిమిదేళ్ల కుమారుడు ఉన్నాడు.
కేసు నేపథ్యం: వివాహం జరిగిన వారం రోజులకే భార్య ప్రవర్తన మారిందని, ఆమె తనను వేధిస్తోందని భర్త విడాకుల పిటిషన్ వేశాడు. ఆమె తన తల్లిదండ్రులను అసభ్య పదజాలంతో దూషించేదని, వంట చేసేది కాదని, బాబు పుట్టిన తర్వాత ఉయ్యాల వేడుకకు తనను పిలవలేదని అతను ఆరోపించాడు.
మరోవైపు, భర్త అంగీకారంతోనే తాను ప్రసవం కోసం పుట్టింటికి వెళ్లానని, వారే వేడుకకు రాలేదని, పైగా అదనపు కట్నం కోసం వేధించారని భార్య ఆరోపించింది.
కోర్టు తీర్పులు: మొదట ఫ్యామిలీ కోర్టు భర్త వాదనలతో ఏకీభవించి విడాకులు మంజూరు చేసింది. అయితే, భార్య హైకోర్టును ఆశ్రయించగా, హైకోర్టు ఆ విడాకులను రద్దు చేసింది. దీనిపై భర్త సుప్రీంకోర్టును ఆశ్రయించగా, తదుపరి విచారణకు ఇరువురినీ వ్యక్తిగతంగా హాజరుకావాలని కోర్టు ఆదేశించింది.