టెహ్రాన్: అమెరికా, ఇజ్రాయెల్ దాడులకు ఇరాన్ అత్యంత ఆక్రోశంతో ప్రతిదాడి ప్రారంభించింది. ముఖ్యంగా నిన్న ఇజ్రాయెల్‌పై జరిపిన ’66వ విడత’ (66th wave) దాడిలో ఇరాన్ తన అసలు బలాన్ని నిరూపించుకుంది. అంతకుముందు వరకు ఇరాన్ పంపిన క్షిపణులను ఇజ్రాయెల్ సమర్థవంతంగా అడ్డుకోగలిగింది, కానీ ఈ తాజా దాడిని అడ్డుకోవడంలో ఆ దేశం తీవ్రంగా శ్రమించాల్సి వచ్చింది.
దాడులు ఎక్కడెక్కడ జరిగాయి? ఇజ్రాయెల్ రాజధాని టెల్ అవీవ్, జెరూసలేం, హైఫా నగరాలతో పాటు ఆ ప్రాంతంలోని అమెరికా సైనిక స్థావరాలపై ఇరాన్ క్షిపణులు మరియు డ్రోన్లతో విరుచుకుపడింది. ఈ ప్రాంతాలన్నీ శక్తివంతమైన క్షిపణి రక్షణ వ్యవస్థల (Missile Defense Systems) నీడలో ఉన్నప్పటికీ, వాటిని ఛేదించుకుంటూ ఇరాన్ దాడులు చేసింది. ఈ దాడిలో ‘క్లస్టర్ బాంబులను’ ఉపయోగించినట్లు సమాచారం.
ఇరాన్ వ్యూహం: సాధారణ క్షిపణులను ఇజ్రాయెల్ రక్షణ వ్యవస్థలు సులభంగా అడ్డుకుంటాయి. కానీ, ఒకే క్షిపణిలో 20 నుండి 80 వరకు చిన్న బాంబులను కలిగి ఉండే ‘క్లస్టర్’ రకపు క్షిపణులను అడ్డుకోవడం చాలా కష్టం. ఒకవేళ క్షిపణిని పేల్చివేసినా, అందులోని చిన్న బాంబులు చెల్లాచెదురుగా పడి భారీ నష్టాన్ని కలిగిస్తాయి. ఇరాన్ ఇప్పుడు ఈ రకపు బాంబులను పెద్ద ఎత్తున ఉపయోగిస్తోంది.
దీనితో పాటు ఖదీర్ (Qadr), ఖోరామ్‌షహర్ (Khorramshahr), ఖైబర్ షెకాన్ (Kheibar Shekan) వంటి మధ్యంతర మరియు సుదూర లక్ష్యాలను ఛేదించే క్షిపణులను, ఆత్మాహుతి డ్రోన్లను (Suicide Drones) ప్రయోగించింది.
చమురు, గ్యాస్ సరఫరాపై ప్రభావం: ఈ యుద్ధం ఇప్పుడప్పుడే ఆగేలా లేదు. దాడులు ఇంకా కొనసాగుతాయని ఇరాన్ ప్రకటించింది. అంతేకాకుండా, అమెరికా మరియు ఇజ్రాయెల్‌కు సహకరించే దేశాలన్నీ తమకు శత్రువులేనని హెచ్చరించింది. గల్ఫ్ దేశాల చమురు శుద్ధి కర్మాగారాలు మరియు చమురు క్షేత్రాలపై జరుగుతున్న దాడుల వల్ల ప్రపంచవ్యాప్తంగా ముడి చమురు, గ్యాస్ సరఫరాకు ఆటంకం కలిగింది. ముఖ్యంగా ఖతార్‌లోని అతిపెద్ద గ్యాస్ క్షేత్రంపై జరిగిన దాడి వల్ల రాబోయే 5 ఏళ్ల వరకు గ్యాస్ సరఫరాలో ఇబ్బందులు ఉంటాయని అంచనా వేస్తున్నారు. ఇది అమెరికాపై పరోక్షంగా ఒత్తిడిని పెంచింది, అక్కడ కూడా ఇంధన ధరలు పెరిగాయి. ఈ నేపథ్యంలో యుద్ధాన్ని ముగించడం గురించి ట్రంప్ మాట్లాడటం ప్రారంభించారు.