టెహ్రాన్: యుద్ధం కారణంగా ఇరాన్ తన హార్ముస్ జలసంధిని మూసివేసింది. అయినప్పటికీ, మన దేశానికి రావాల్సిన ముడి చమురు మరియు గ్యాస్ నౌకలు అప్పుడప్పుడు సురక్షితంగా ఈ మార్గాన్ని దాటుతూ భారత్‌కు చేరుకుంటున్నాయి. ప్రస్తుతం 22 భారతీయ నౌకలు అక్కడ చిక్కుకుపోగా, అవి సురక్షితంగా బయటపడటానికి ఇరాన్ ఒక ప్రత్యేక సముద్ర మార్గాన్ని (Special Sea Route) ఏర్పాటు చేస్తున్నట్లు సమాచారం. ఇది భారత్ సాధించిన దౌత్య విజయంగా పరిగణించబడుతోంది.
నేపథ్యం: అమెరికా, ఇజ్రాయెల్‌తో జరుగుతున్న యుద్ధం కారణంగా హార్ముస్ జలసంధిని మూసివేస్తున్నట్లు ఇరాన్ ప్రకటించింది. ఈ మార్గం గుండా వెళ్లే నౌకలపై దాడులు చేస్తామని హెచ్చరించింది. సౌదీ అరేబియా, ఖతార్, యూఏఈ వంటి దేశాల నుండి మనకు చమురు సరఫరా జరగాలంటే ఈ జలసంధి అత్యంత కీలకం. ప్రపంచవ్యాప్త చమురు వాణిజ్యంలో 20 శాతం ఈ మార్గం ద్వారానే జరుగుతుంది.
ప్రధాని మోదీ, విదేశీ వ్యవహారాల మంత్రి జైశంకర్ ఇరాన్ ప్రభుత్వంతో జరిపిన చర్చల ఫలితంగా భారతీయ నౌకలకు అనుమతి లభించింది. మార్చి 12న ప్రధాని మోదీ ఇరాన్ అధ్యక్షుడు మసూద్ పెజెష్కియాన్‌తో ఫోన్లో మాట్లాడిన తర్వాత ఈ ప్రక్రియ వేగవంతమైంది.
లాయిడ్స్ లిస్ట్ ఇంటెలిజెన్స్ (LLI) ధృవీకరణ: సముద్రయాన డేటా సంస్థ ‘లాయిడ్స్ లిస్ట్ ఇంటెలిజెన్స్’ ఈ విషయాన్ని ధృవీకరించింది. “భారతీయ నౌకలు సురక్షితంగా వెళ్లడానికి ఇరాన్ అనుమతించింది. భారత ఇంధన భద్రతను దృష్టిలో ఉంచుకుని ఈ చర్యలు తీసుకున్నారు. ఇప్పటికే రెండు నౌకలు సురక్షితంగా వెళ్లగా, మిగిలిన 22 నౌకలను కూడా ఇదే మార్గంలో పంపేందుకు ప్రణాళికలు సిద్ధమయ్యాయి. అయితే భారత నౌకలు విడివిడిగా కాకుండా ఒకదాని వెనుక ఒకటి ప్రయాణించాలని ఇరాన్ అధికారులు సూచించారు” అని ఆ సంస్థ తెలిపింది.
LLI ఎడిటర్ రిచర్డ్ మీడ్ మాట్లాడుతూ.. “భారతదేశానికి ఎల్‌పిజిని తీసుకెళ్తున్న ఒక నౌక ఇరాన్ లోని ‘లారక్ ద్వీపం’ (Larak Island) మీదుగా ప్రయాణించింది. ఇది సాధారణ నౌకలు వెళ్లే మార్గం కాదు. ఇరాన్ యొక్క IRGC నౌకాదళం భారత నౌకలను సులభంగా గుర్తించి, పొరపాటున దాడులు చేయకుండా ఉండటానికి ఈ కొత్త మార్గాన్ని కేటాయించారు” అని పేర్కొన్నారు.