న్యూఢిల్లీ: పాన్ (PAN) కార్డ్‌కు సంబంధించిన నిబంధనల్లో ఏప్రిల్ 1, 2026 నుండి భారీ మార్పులు అమలులోకి రానున్నాయి. ప్రభుత్వ ఆధీనంలోని కామన్ సర్వీస్ సెంటర్ (CSC) ఈ మార్పులకు సంబంధించిన సమాచారాన్ని విడుదల చేసింది.
కొత్త నిబంధనల ప్రకారం, ఇకపై కేవలం ఆధార్ కార్డ్ ఉంటేనే కొత్త పాన్ కార్డ్ కోసం దరఖాస్తు చేయడం లేదా పాత కార్డులో మార్పులు చేయడం సాధ్యం కాదు. దరఖాస్తుదారులు ఆధార్‌తో పాటు మరికొన్ని అదనపు పత్రాలను కూడా సమర్పించాల్సి ఉంటుంది. ఆ మార్పుల వివరాలు ఇక్కడ ఉన్నాయి:
ఏమి మారింది? ఇప్పటివరకు ప్రజలు కేవలం ఆధార్ కార్డ్ ఆధారంగానే పాన్ కార్డ్ కోసం దరఖాస్తు చేసుకునేవారు. ఆధార్ కార్డులోని వివరాలనే పుట్టిన తేదీ ధృవీకరణగా పరిగణించేవారు. అయితే, మార్చి 31, 2026 తర్వాత ఈ సౌకర్యం అందుబాటులో ఉండదు. ఏప్రిల్ 1 నుండి దరఖాస్తు సమర్పించేటప్పుడు.. పుట్టిన తేదీ ధృవీకరణ కోసం బర్త్ సర్టిఫికేట్, ఓటర్ ఐడి, 10వ తరగతి మార్కుల జాబితా, పాస్‌పోర్ట్, డ్రైవింగ్ లైసెన్స్ లేదా మెజిస్ట్రేట్ జారీ చేసిన అఫిడవిట్ వంటి పత్రాలను తప్పనిసరిగా సమర్పించాలి.
దరఖాస్తుదారుడి పేరు విషయంలో కూడా ఒక ముఖ్యమైన మార్పు చేశారు. కొత్త నిబంధనల ప్రకారం, పాన్ కార్డ్‌పై ఉండే పేరు ఆధార్ కార్డ్‌లో ఉన్న పేరుతో ఖచ్చితంగా సరిపోలాలి. ఒకవేళ రెండు పత్రాల్లో పేర్లు వేర్వేరుగా ఉంటే, ఆధార్ కార్డులో ఉన్న పేరునే ప్రామాణికంగా తీసుకుంటారు. కాబట్టి, మీ ఆధార్ వివరాలు సరిగ్గా ఉన్నాయో లేదో ముందే చూసుకోవడం ముఖ్యం. అలాగే, ఏప్రిల్ 1, 2026 తర్వాత పాన్ కార్డ్ కోసం కొత్త దరఖాస్తు ఫారమ్‌లను విడుదల చేస్తారు. పాత ఫారమ్‌లు ఇకపై చెల్లుబాటు కావు.
ఆదాయపు పన్ను శాఖ ప్రతిపాదనలు: ఆదాయపు పన్ను శాఖ పాన్ కార్డ్ వినియోగానికి సంబంధించి కొన్ని సవరణలను ప్రతిపాదించింది:
- ఆస్తి కొనుగోలు/అమ్మకం: ఆస్తి లావాదేవీల సమయంలో పాన్ కార్డ్ వివరాలు తెలపాల్సిన పరిమితిని ₹10 లక్షల నుండి ₹20 లక్షలకు పెంచారు.
- వాహనాల కొనుగోలు: వాహనం ఖరీదు ₹5 లక్షల కంటే ఎక్కువగా ఉంటేనే పాన్ కార్డ్ అవసరమవుతుంది.
- హోటల్ ఖర్చులు: గతంలో హోటల్ బిల్లు ₹50,000 దాటితే పాన్ కార్డ్ అడిగేవారు, ఇప్పుడు ఆ పరిమితిని ₹1 లక్షకు పెంచారు.
ఈ మార్పుల దృష్ట్యా, మీరు పాన్ కార్డ్ కోసం దరఖాస్తు చేసుకోవాలని భావిస్తే.. మార్చి 31, 2026 లోపు పాత నిబంధనల ప్రకారం దరఖాస్తు చేసుకోవడం సులభతరంగా ఉంటుంది.