ప్రపంచవ్యాప్తంగా ముడి చమురు ధరలు ఆకాశాన్ని తాకుతున్న వేళ, ఐరోపా సమాఖ్య (EU) నుండి భారత్ వంటి పెద్ద చమురు కొనుగోలుదారులకు భారీ ఉపశమనం కలిగించే వార్త వచ్చింది. రష్యా చమురు దిగుమతులపై శాశ్వత నిషేధం విధించాలనే తన నిర్ణయం నుండి యూరప్ ప్రస్తుతానికి ఒక అడుగు వెనక్కి వేసింది.
అసలు ఏం జరిగింది?
ఏప్రిల్ 15న యూరోపియన్ కమిషన్ ఒక కఠినమైన చట్టాన్ని ప్రవేశపెట్టాలని భావించింది. ఉక్రెయిన్ యుద్ధం నేపథ్యంలో రష్యా నుండి వచ్చే చమురు దిగుమతులపై శాశ్వత నిషేధం విధించడం ఈ ప్రతిపాదన ముఖ్య ఉద్దేశ్యం. అయితే, మంగళవారం విడుదల చేసిన కొత్త ఎజెండాలో ఈ ప్రతిపాదనను వాయిదా వేస్తున్నట్లు యూరప్ ప్రకటించింది. ప్రస్తుత అంతర్జాతీయ రాజకీయ పరిస్థితుల (Geopolitics) దృష్ట్యా ఏప్రిల్‌లో దీనిని ప్రవేశపెట్టడం లేదని ఒక అధికారి ధృవీకరించారు.
భారత్‌కు ఎలా ‘బల్లే-బల్లే’ (భారీ లాభం)?
ఈ నిర్ణయం వల్ల భారత్‌కు రెండు రకాలుగా ప్రయోజనం చేకూరనుంది:
- తక్కువ ధరకే చమురు: భారత్ రష్యా నుండి తక్కువ ధరకే ముడి చమురును కొనుగోలు చేసి, దానిని రిఫైన్ చేస్తుంది. ఆ తర్వాత తయారైన పెట్రోకెమికల్ ఉత్పత్తులను తిరిగి యూరప్ మార్కెట్లలోనే విక్రయిస్తుంది. ఈ వ్యాపారం ద్వారా భారత చమురు కంపెనీలు భారీ లాభాలను ఆర్జిస్తున్నాయి.
- అడ్డంకులు తొలగిపోవడం: ఒకవేళ యూరప్ శాశ్వత నిషేధం విధించి ఉంటే, రష్యా చమురుతో తయారైన ఉత్పత్తుల విక్రయాలపై ఆంక్షలు వచ్చేవి. ఇప్పుడు ఆ ముప్పు తప్పడంతో భారత రిఫైనరీలు ఎటువంటి అడ్డంకులు లేకుండా తమ ఎగుమతులను కొనసాగించవచ్చు.
యూరప్ ఎందుకు వెనక్కి తగ్గింది?
దీనికి ప్రధాన కారణం ఇరాన్-ఇజ్రాయెల్ యుద్ధం. అంతర్జాతీయ ఇంధన సంస్థ (IEA) ప్రకారం, ఈ యుద్ధం వల్ల ప్రపంచవ్యాప్తంగా చమురు సరఫరాలో తీవ్ర సంక్షోభం ఏర్పడింది. ఇలాంటి సమయంలో రష్యా చమురుపై కూడా శాశ్వత నిషేధం విధిస్తే, ధరలు నియంత్రణ కోల్పోయి యూరప్ ఆర్థిక వ్యవస్థ కుప్పకూలే ప్రమాదం ఉంది. అందుకే హంగేరీ వంటి దేశాల నిరసనల మధ్య యూరప్ తన ప్లాన్‌ను మార్చుకోవాల్సి వచ్చింది.