లూథియానా: పంజాబ్‌లోని లూథియానాలో ఆర్థిక ఇబ్బందులతో సతమతమవుతున్న ఒక మహిళకు 35,000 రూపాయల అప్పు తీసుకోవడం ఒక భయంకరమైన అనుభవంగా మారింది. సహాయం పేరిట ఒక ఫైనాన్షియర్ ఆ మహిళ ముందు పెట్టిన నీచమైన నిబంధన ఆమె జీవితాన్ని నరకప్రాయం చేసింది.
ఈ ఘటన జనవరి 5న జరిగింది. సదరు మహిళ తన ఆర్థిక అవసరాల కోసం ఒక ఫైనాన్షియర్ కార్యాలయానికి వెళ్లి 35,000 రూపాయల అప్పు తీసుకుంది. దీని కోసం నిందితుడు ఆమె నుండి ఒక ఖాళీ చెక్ మరియు ప్రామిసరీ నోట్‌పై సంతకాలు చేయించుకున్నాడు. మార్చి నెల నుండి నెలకు 10,000 రూపాయల వంతున వాయిదాల పద్ధతిలో అప్పు తీర్చాలని ఇద్దరి మధ్య ఒప్పందం కుదిరింది.
వారానికి ఒక రాత్రి నాతో గడుపు.. అప్పు మాఫీ! మార్చి 7న పరిస్థితి పూర్తిగా మారిపోయింది. ఫైనాన్షియర్ ఆ మహిళను తన కార్యాలయానికి పిలిపించి, “నువ్వు అప్పు తీర్చాల్సిన అవసరం లేదు… వారం లో ఒక రాత్రి నాతో గడిపితే చాలు” అని అన్నాడు. అంతేకాకుండా, వారానికి ఒక రాత్రికి ఒప్పుకుంటే ఏడాదికి 5-6 లక్షల రూపాయలు ఇస్తానని ఆశ చూపాడు. మహిళ ఈ నీచమైన ప్రతిపాదనను తెగేసి చెప్పినప్పటికీ, నిందితుడు ఆమెను వదల్లేదు. వరుస ఫోన్ కాల్స్, బెదిరింపులతో ఆమెను మానసికంగా వేధించడం మొదలుపెట్టాడు. ఈ వేధింపుల వల్ల ఆమె పనిపై శ్రద్ధ పెట్టలేకపోవడంతో, కంపెనీ యజమాని ఆమెను ఉద్యోగం నుండి తీసేశాడు.
35 వేలు తిరిగి ఇచ్చినా ఆగని వేధింపులు తీవ్ర ఒత్తిడికి లోనైన ఆ మహిళ, చివరకు తన బంగారాన్ని అమ్మి గూగుల్ పే (Google Pay) ద్వారా 35,000 రూపాయలను నిందితుడికి తిరిగి చెల్లించింది. అయినప్పటికీ, నిందితుడు తన పరపతిని ఉపయోగించి ఆమెను వేధిస్తూనే ఉన్నాడు. అప్పుకు సంబంధించిన పత్రాలను తగులబెట్టినట్లు నాటకమాడాడు. ఈ ఘటనపై ఫిర్యాదు అందుకున్న సుధార్ పోలీసులు విచారణ ప్రారంభించారు. ప్రాథమిక విచారణలో పోలీసులకు ఫోన్ సంభాషణల రికార్డింగ్‌లతో సహా కీలక ఆధారాలు లభించాయి. మహిళను మానసికంగా వేధించినందుకు నిందితుడిపై కేసు నమోదు చేసి అరెస్టు చేశారు.
మహిళ పరిస్థితి విషమం పోలీసుల సమాచారం ప్రకారం, నిందితుడు తన డబ్బు మరియు పలుకుబడిని ఉపయోగించి మహిళపై తీవ్ర ఒత్తిడి తెచ్చాడు. ప్రస్తుతం ఈ కేసు విచారణలో ఉంది. తీవ్ర మానసిక ఒత్తిడికి లోనైన ఆ మహిళ ఆసుపత్రిలో చికిత్స పొందుతోంది. గత కొన్ని రోజులుగా ఆమె ఏమీ తినకపోవడంతో శారీరకంగా చాలా బలహీనపడిందని వైద్యులు తెలిపారు.