రాజస్థాన్‌లోని బార్మర్‌లో ఉన్న ఒక ఇండియన్ ఆయిల్ పెట్రోల్ బంక్ వద్ద ఒక వింత సంఘటన జరిగింది. డీజిల్ కోసం క్యూలో వేచి ఉన్న ఒక వ్యక్తి తన కారును బలంగా ఊపుతూ కెమెరాకు చిక్కాడు.
ట్యాంక్‌లో అదనపు డీజిల్ పట్టేందుకే తాను ఇలా చేస్తున్నానని అతను చెప్పాడు. పెట్రోల్ బంక్ వద్ద ఉన్న రద్దీపై ఒక జర్నలిస్ట్ రిపోర్టింగ్ చేస్తున్న సమయంలో ఈ ఘటన వెలుగులోకి వచ్చింది. ఆ వ్యక్తి చేస్తున్న వింత పనిని చూసి ఆశ్చర్యపోయిన జర్నలిస్ట్, అతని దగ్గరకు వెళ్లి ఇదేం టెక్నిక్ అని అడిగారు.
వీడియోలోని సంభాషణ: జర్నలిస్ట్: “ఇదేం ‘జుగాడ్’ (చిట్కా)? మీరు చేస్తున్నది చూస్తుంటే వింతగా ఉంది.” ఆ వ్యక్తి: “రేపటి నుండి డీజిల్ దొరకదని విన్నాను, అందుకే ఈరోజు ఎంత వీలైతే అంత నింపుకుంటున్నాను.” జర్నలిస్ట్: “మరి ఇలా కారును ఊపితే ట్యాంక్ కెపాసిటీ పెరుగుతుందా?” ఆ వ్యక్తి: “ఖచ్చితంగా! ఇలా చేయడం వల్ల ట్యాంక్‌లో మరో 5 నుండి 7 లీటర్ల డీజిల్ అదనంగా పడుతుంది” అని ఎంతో నమ్మకంగా సమాధానమిచ్చాడు.
ఒక యూజర్ ఈ వీడియోను ఎక్స్ (ట్విట్టర్)లో పోస్ట్ చేస్తూ.. “లిక్విడ్ సెటిల్ అవ్వడానికి కారును ఊపుతున్నాడు. ఇలా చేస్తే 8 లీటర్లు ఎక్కువ పడుతుందట. మన అవగాహన స్థాయి ఇలా ఉంటే, సగటు IQ అంచనాల కంటే చాలా తక్కువగా ఉన్నట్లే” అని రాసుకొచ్చారు.
సోషల్ మీడియా స్పందన:
ఈ వీడియోపై నెటిజన్లు రకరకాలుగా స్పందిస్తున్నారు:
- ఒక యూజర్: “2026లో కూడా ప్రజలు ఇలాంటి ‘వూడూ ఫిజిక్స్’ (మూఢనమ్మక భౌతికశాస్త్రం) నమ్ముతున్నారంటే ఆశ్చర్యంగా ఉంది. కారును ఊపడమే గొప్ప టెక్నిక్ అని భావిస్తే మన IQ సంక్షోభంలో ఉన్నట్లే.”
- మరో యూజర్: “అతని ఆత్మవిశ్వాసం చూస్తుంటే భయమేస్తోంది. ఏమాత్రం సంకోచం లేకుండా చేస్తున్నాడు. ఇది ముందే చేసి ఉంటాడు, మళ్ళీ చేస్తాడు కూడా.”
- ఇంకొకరు: “రేపు టీవీ సిగ్నల్ రాకపోతే టీవీని కొడతాడు, గ్యాస్ నాజిల్ ఊదుతాడు కాబోలు.. వూడూ ఫిజిక్స్‌కు బాస్ ఇతను” అని ఎద్దేవా చేశారు.