ఒకవైపు భారత్‌కు రామనవమి శుభాకాంక్షలు తెలుపుతూనే, మరోవైపు ఇరాన్ మద్దతుదారుల గుండెల్లో రైళ్లు పరిగెత్తించేలా ఇజ్రాయెల్ ఒక హెచ్చరిక జారీ చేసింది. ఐక్యరాజ్యసమితి భద్రతా మండలి (UNSC)లో ఇజ్రాయెల్ రాయబారి ఒక గడియారం మరియు మొబైల్ ఫోన్‌తో సంచలనం సృష్టించారు.
ఆ సమయంలో భద్రతా మండలిలో ఉన్న వివిధ దేశాల రాయబారులు సైతం ఒక్కసారిగా దిగ్భ్రాంతికి గురయ్యారు. ఐక్యరాజ్యసమితిలో ఇజ్రాయెల్ రాయబారి డెన్నీ డానన్ ప్రసంగిస్తూ.. అకస్మాత్తుగా తన ఫోన్‌లో ‘రెడ్ అలర్ట్ సైరన్’ ప్లే చేశారు. ఆ తర్వాత గడియారంలో 15 సెకన్ల టైమర్ సెట్ చేశారు. ఆయన ఎందుకు అలా చేశారో ఆయనే వివరించారు.
15 సెకన్ల మరణ శాసనం!
ఇజ్రాయెల్ పౌరులు నిత్యం క్షిపణి దాడుల నీడలో ఎలా గడుపుతున్నారో ప్రపంచానికి చూపడమే డెన్నీ డానన్ ఉద్దేశ్యం. “ఉగ్రవాదులు ఇజ్రాయెల్‌పై రాకెట్లు ప్రయోగించినప్పుడు, మా పౌరుల ఫోన్లలో సరిగ్గా ఇదే సైరన్ మోగుతుంది. తమ ప్రాణాలు కాపాడుకోవడానికి వారి వద్ద ఉండే సమయం కేవలం 15 సెకన్లే” అని ఆయన పేర్కొన్నారు.
“ఒక్క క్షణం దీని గురించి ఆలోచించండి. మీరు ఇంట్లో ఉన్నారు, మీకు ముగ్గురు పిల్లలు ఉన్నారు. కేవలం 15 సెకన్లలో మీరు ఎవరిని ముందుగా కాపాడతారు? మిగిలిన వారి కోసం మళ్లీ వెళ్తారా? మీ వృద్ధ తల్లిదండ్రులను ఎలా తీసుకెళ్తారు? ఒకవేళ ఆ సమయంలో మీరు ఇంట్లో లేకపోతే మీ పిల్లల పరిస్థితి ఏంటి?” అంటూ ఆయన వేసిన ప్రశ్నలు అక్కడి వారిని ఆలోచనలో పడేశాయి.
వైట్ హౌస్ రహస్య పోస్ట్.. ఇరాన్ పై ట్రంప్ పెద్ద నిర్ణయం తీసుకోబోతున్నారా?
ఇదే సమయంలో ఇరాన్‌పై డొనాల్డ్ ట్రంప్ ఏదైనా భారీ ప్రకటన చేయబోతున్నారా అనే ఉత్కంఠ నెలకొంది. మరోవైపు, హోర్ముజ్ జలసంధిపై ఇరాన్ హెచ్చరికలు జారీ చేసింది. అమెరికా ఎలాంటి చర్యకు దిగినా కఠినంగా బదులిస్తామని ఐఆర్జీసీ (IRGC) తెలిపింది.
ఇరాన్ భారీ మూల్యం చెల్లించుకోక తప్పదు: ఇజ్రాయెల్
ఇరాన్‌పై ఇజ్రాయెల్ దాడులు వేగంగా మరియు విస్తృతంగా ఉంటాయని ఇజ్రాయెల్ రక్షణ మంత్రి ఇజ్రాయెల్ కాట్జ్ హెచ్చరించారు. ప్రధాని నెతన్యాహుతో కలిసి తాము ఇరాన్ ఉగ్రవాద పాలనకు స్పష్టమైన హెచ్చరికలు జారీ చేశామన్నారు. యుద్ధ నేరాలకు పాల్పడుతున్న ఇరాన్ భారీ మూల్యం చెల్లించుకుంటుందని చెప్పారు.
గురువారం ఇరాన్ రివల్యూషనరీ గార్డ్ నావికాదళ ప్రధాన కమాండర్ అలీరెజా తంగ్‌సిరిని హతమార్చినట్లు ఇజ్రాయెల్ ప్రకటించింది. హోర్ముజ్ జలసంధిని మూసివేయాలనే వ్యూహానికి ఈయనే నాయకత్వం వహిస్తున్నారు. నెతన్యాహు ఒక వీడియో సందేశంలో మాట్లాడుతూ.. “నిన్న రాత్రి మేము ఐఆర్జీసీ నావికాదళ కమాండర్‌ను అంతం చేశాము. ఇతని చేతులకు రక్తం అంటింది” అని పేర్కొన్నారు. ఇరాన్ మరియు హిజ్బుల్లా జరిపిన దాడుల వల్ల ఇజ్రాయెల్‌లో సైరన్లు మోగాయని, కనీసం పది మంది గాయపడ్డారని వైద్య వర్గాలు తెలిపాయి.