న్యూఢిల్లీ: ఏప్రిల్ 1 నుండి ఏటీఎం నిబంధనల్లో బ్యాంకులు కీలక మార్పులు చేయబోతున్నాయి. హెచ్‌డీఎఫ్‌సీ బ్యాంక్ (HDFC), పంజాబ్ నేషనల్ బ్యాంక్ (PNB), బంధన్ బ్యాంకులు ఈ మార్పులను ప్రకటించాయి.
నగదు ఉపసంహరణ ప్రక్రియను క్రమబద్ధీకరించడంలో భాగంగా ఈ చర్యలు తీసుకుంటున్నారు. ప్రధానంగా రోజువారీ నగదు పరిమితి తగ్గించే అవకాశం ఉంది. అంతేకాకుండా, యూపీఐ (UPI) ఆధారిత నగదు ఉపసంహరణలను ఇకపై నెలవారీ ఉచిత ఏటీఎం లావాదేవీల పరిమితిలో చేర్చనున్నారు.
హెచ్‌డీఎఫ్‌సీ బ్యాంక్ (HDFC Bank)
యూపీఐ యాప్ ద్వారా క్యూఆర్ కోడ్ స్కాన్ చేసి ఏటీఎం నుండి నగదు తీసుకోవడాన్ని హెచ్‌డీఎఫ్‌సీ బ్యాంక్ తన నెలవారీ ఉచిత లావాదేవీల పరిమితిలో చేర్చింది. ఏటీఎం కార్డు లేకుండా యూపీఐ ద్వారా నగదు తీసుకునే వారికి ఇది ఒక ఎదురుదెబ్బ. ఉచిత లావాదేవీల సంఖ్య (నెలకి 5 సార్లు) దాటిన తర్వాత, మీరు యూపీఐ ద్వారా నగదు తీసినా ప్రతిసారీ ₹23 + జీఎస్టీ ఫీజుగా చెల్లించాల్సి ఉంటుంది.
ప్రస్తుతం హెచ్‌డీఎఫ్‌సీ సేవింగ్స్ ఖాతాదారులకు సొంత బ్యాంక్ ఏటీఎంలలో 5 ఉచిత లావాదేవీలు, ఇతర బ్యాంక్ ఏటీఎంలలో మెట్రో నగరాల్లో 3, ఇతర ప్రాంతాల్లో 5 ఉచిత లావాదేవీలు అందుబాటులో ఉన్నాయి.
పంజాబ్ నేషనల్ బ్యాంక్ (PNB)
పీఎన్‌బీ కొన్ని రకాల డెబిట్ కార్డుల రోజువారీ నగదు ఉపసంహరణ పరిమితిని సవరించింది. గతంలో కొన్ని కార్డులపై రోజుకు లక్ష రూపాయల వరకు తీసుకునే అవకాశం ఉండగా, కొత్త నిబంధనల ప్రకారం దీనిని ₹50,000 నుండి ₹75,000 మధ్యకు తగ్గించారు. ఇది అన్ని కార్డులకు వర్తించదు, కార్డు రకాన్ని బట్టి మారుతుంది. పెద్ద మొత్తంలో నగదు అవసరమైతే నెట్ బ్యాంకింగ్ లేదా యూపీఐ వంటి డిజిటల్ మార్గాలను ఉపయోగించాలని బ్యాంక్ సూచించింది.
బంధన్ బ్యాంక్ (Bandhan Bank)
బంధన్ బ్యాంక్ కూడా నెలవారీ ఉచిత లావాదేవీల సంఖ్యను సవరించింది. సొంత బ్యాంక్ ఏటీఎంలలో 5 సార్లు, ఇతర బ్యాంక్ ఏటీఎంలలో మెట్రో నగరాల్లో 3, ఇతర చోట్ల 5 సార్లు ఉచితంగా నగదు తీసుకోవచ్చు. ఈ పరిమితి దాటిన తర్వాత ప్రతి లావాదేవీకి ₹23 అదనంగా వసూలు చేస్తారు. అయితే, నగదు రహిత లావాదేవీలకు (Balance enquiry వంటివి) ఎటువంటి పరిమితి లేదు.
జియో పేమెంట్స్ బ్యాంక్ (Jio Payments Bank)
జియో పేమెంట్స్ బ్యాంక్ వినియోగదారులు ఇప్పుడు బ్యాంకింగ్ పాయింట్ల వద్ద మొబైల్ యాప్ ద్వారా క్యూఆర్ కోడ్ స్కాన్ చేసి నగదును విత్ డ్రా చేసుకోవచ్చు.