చెన్నై: “శత్రువుకి శత్రువు మిత్రుడు” – ఇది చాణక్య నీతి అవునో కాదో కానీ, తమిళనాడు రాజకీయాల్లో ఎప్పుడూ వర్కౌట్ అయ్యే ఫార్ములా. ఇప్పుడు చెన్నైలోని పెరంబూర్ నియోజకవర్గం ఈ ఫార్ములాకు ప్రయోగశాలగా మారింది. అక్కడ ఏఐఏడీఎంకే (AIADMK) పోటీ చేయకుండా పీఎంకే (PMK) ని నిలబెట్టడం విజయ్ కు వ్యతిరేకంగా మారే సూచనలు కనిపిస్తున్నాయి. ఎందుకంటే అక్కడ డీఎంకే తరపున మళ్లీ ఆర్.డి. శేఖర్ బరిలో ఉన్నారు.
విజయ్ కి చెందిన ‘తమిళ వెట్రి కజగం’ (TVK) తన మొదటి అడుగును పెరంబూర్‌లో వేయడానికి సిద్ధమవుతోంది. “దళపతి వస్తున్నారు.. రికార్డులు సృష్టిస్తారు” అని ఒకవైపు తమ్ముళ్లు ఖుషీగా ఉంటే, మరోవైపు సైలెంట్‌గా ఒక స్కెచ్ సిద్ధమైంది. అదే ఏఐఏడీఎంకే-పీఎంకే కూటమి డీల్.
ఏఐఏడీఎంకే వేసిన ‘సరెండర్’ లెక్క! పెరంబూర్ సంప్రదాయబద్ధంగా ద్రావిడ పార్టీల కోట. ఇక్కడ ఏఐఏడీఎంకే తన సొంత చిహ్నం ‘రెండాకులు’ను రంగంలోకి దించకుండా, కూటమి పార్టీ అయిన పీఎంకే కి కేటాయించడం అందరినీ ఆశ్చర్యపరిచింది. దీని వెనుక ఉన్న లాజిక్ చాలా సింపుల్: విజయ్ విజయాన్ని అడ్డుకోవడం. ఏఐఏడీఎంకే ఓటు బ్యాంకు విజయ్ వైపు మళ్లకుండా చూడటం, ఒకవేళ విజయ్ గెలిస్తే అది ఏఐఏడీఎంకేకి పెద్ద ఎదురుదెబ్బగా మారుతుందని భావించి, ఈ నియోజకవర్గాన్ని పీఎంకే కి ‘గిఫ్ట్’ ఇచ్చి ఎడప్పాడి వర్గం పక్కకు తప్పుకుంది.
ఒకవేళ డీఎంకే, ఏఐఏడీఎంకే అక్కడ నేరుగా తలపడితే ఓట్లు చీలిపోతాయి.. దానిని ఉపయోగించుకుని విజయ్ గెలిచే అవకాశం ఉంటుంది. కానీ ఇప్పుడు పీఎంకే నిలబడటంతో, పెరంబూర్‌లో పీఎంకే కి పెద్దగా బలం లేకపోవడం వల్ల ఏఐఏడీఎంకే కార్యకర్తలు సహజంగానే డీఎంకే అభ్యర్థి వైపు మొగ్గు చూపే అవకాశం ఉంది. దీనివల్ల ఓట్లన్నీ డీఎంకే వైపు మళ్లి విజయ్ కి ఇబ్బందిగా మారుతుంది.
ఆర్.డి. శేఖర్‌కు తగిలిన లక్కీ ప్రైజ్! ప్రస్తుత డీఎంకే ఎమ్మెల్యే ఆర్.డి. శేఖర్ (RDS) ముఖం ఇప్పుడు వెలిగిపోతోంది. దానికి కారణాలు:
- ఓట్ల ఏకీకరణ: పెరంబూర్‌లో పీఎంకే కి పెద్దగా ప్రభావం లేదన్నది బహిరంగ రహస్యం. అక్కడ ‘మామిడి పండు’ గుర్తుపై పీఎంకే నిలబడినప్పుడు, తీవ్రమైన ఏఐఏడీఎంకే కార్యకర్తలకు పెద్దగా ఉత్సాహం ఉండదు.
- మద్దతు మళ్లింపు: విజయ్ ‘కొత్త రాజకీయం’ తమకు సెట్ కాదని భావించే స్థానిక ఏఐఏడీఎంకే నేతలు, తమ ‘ఈగో’ కారణంగా పీఎంకే కి పనిచేయకుండా, స్థానికంగా పట్టున్న ‘మనవాడు’ ఆర్.డి. శేఖర్ వైపే మొగ్గు చూపే ఛాన్స్ ఉంది.
- అభివృద్ధి పనులు: గత ఐదేళ్లలో ఉత్తర చెన్నై అభివృద్ధి కోసం ₹4500 కోట్లు కేటాయించడంలో శేఖర్ పాత్ర, గణేశపురం ఫ్లైఓవర్, కొడుంగైయూర్ డంపింగ్ యార్డ్ క్లీనింగ్ వంటివి ఆయనకు ప్లస్ పాయింట్లు.
మొత్తానికి, విజయ్‌ని ఓడించడానికి ఏఐఏడీఎంకే వేసిన వల, ఆర్.డి. శేఖర్‌ను మళ్లీ అసెంబ్లీకి పంపే రెడ్ కార్పెట్‌లా మారుతోందని పెరంబూర్ రాజకీయ వర్గాలు చర్చించుకుంటున్నాయి.