న్యూయార్క్: మధ్యప్రాచ్యంలో యుద్ధం రోజురోజుకూ ముదురుతోంది. ఇరాన్ లక్ష్యంగా అమెరికా మరియు ఇజ్రాయెల్ సంయుక్తంగా దాడులు ప్రారంభించి మూడు వారాలు గడిచాయి. ఈ కాలంలో ఇరాన్ జరిపిన క్షిపణి మరియు డ్రోన్ దాడుల వల్ల అమెరికా సైన్యానికి ఊహించని స్థాయిలో నష్టం వాటిల్లిందని సమాచారం.
ఈ దాడుల్లో అమెరికాకు చెందిన సుమారు 3 బిలియన్ డాలర్ల విలువైన సైనిక సంపద ధ్వంసమైందని తెలుస్తోంది. భారత కరెన్సీలో దీని విలువ సుమారు రూ. 25,000 కోట్ల నుండి రూ. 29,000 కోట్ల వరకు ఉంటుందని అంచనా. అమెరికాలోని ప్రముఖ దినపత్రిక ‘వాల్ స్ట్రీట్ జర్నల్’ ఈ వివరాలను వెల్లడించింది.
అమెరికా సైన్యానికి భారీ దెబ్బ
యుద్ధం మొదలైన మొదటి మూడు వారాల్లోనే అమెరికాకు ఈ స్థాయిలో నష్టం జరగడం గమనార్హం. మాజీ రక్షణ శాఖ అధికారి ఎలాన్ మెకక్కర్ ఈ గణాంకాలను ధృవీకరించినట్లు సమాచారం. ఈ దాడుల్లో అమెరికాకు చెందిన అత్యాధునిక యుద్ధ విమానాలు కూడా దెబ్బతిన్నాయి.
F-35 యుద్ధ విమానం: ప్రపంచంలోనే అత్యంత శక్తివంతమైన ఎఫ్-35 యుద్ధ విమానం ఒకటి తీవ్రంగా దెబ్బతిని అత్యవసరంగా ల్యాండ్ అయినట్లు తెలుస్తోంది.
F-15E విమానాలు: పొరపాటున జరిగిన దాడుల్లో మూడు ఎఫ్-15ఈ యుద్ధ విమానాలు కూలిపోయాయని సమాచారం.
సైనికుల మృతి: ఇరాక్ గగనతలంలో రెండు ఇంధన ట్యాంకర్ విమానాలు (Refueling planes) ఢీకొనడంతో ఆరుగురు అమెరికా సైనికులు ప్రాణాలు కోల్పోయారు.
ధ్వంసమైన డ్రోన్లు మరియు యుద్ధనౌకలు
MQ-9 రీపర్ డ్రోన్లు: అమెరికా గూఢచారి వ్యవస్థలో కీలకమైన 12 కంటే ఎక్కువ MQ-9 రీపర్ డ్రోన్లను ఇరాన్ కూల్చివేసింది. ఒక్కో డ్రోన్ విలువ కోట్లాది రూపాయలు ఉంటుంది.
రేడార్ వ్యవస్థలు: సౌదీ అరేబియా, ఖతార్ మరియు జోర్డాన్‌లోని అమెరికా సైనిక స్థావరాల్లో ఉన్న రేడార్ వ్యవస్థలు ఇరాన్ క్షిపణి దాడులకు గురయ్యాయి. శత్రువుల కదలికలను ముందుగా పసిగట్టే ఈ రేడార్‌లు దెబ్బతినడం అమెరికాకు పెద్ద మైనస్.
USS గెరాల్డ్ ఆర్. ఫోర్డ్: గ్రీస్ తీరంలో నిలిపి ఉంచిన అమెరికాకు చెందిన అతిపెద్ద యుద్ధనౌక ‘యుఎస్ఎస్ గెరాల్డ్ ఆర్. ఫోర్డ్’లో కూడా అగ్నిప్రమాదం సంభవించినట్లు వార్తలు వస్తున్నాయి.